Hripui vei 1,502 hmuh belh a ni ; Hmuh tam ber ní a thleng leh

September 13, Thawh­­ṭanni khan Mizo­ramah Covid-19 vei mi 1,502 hmuh belh a ni a; Mizorama hmuh chhuah tam ber ni a nih bakah, India ram state leh union territory 36 zingah hmuh tam lamah palina a ni. Nimin khan hripui vei dam tawh mi 879 chhuahtir an ni a, hripui vangin mi pathum an thi.

Covid-19 vei hmuh tharte chu ZMC labo­ratory-a hmuh chhuah 335, TrueNAT hmanga hmuh 59, RAT hmanga hmuh 1,087 leh Fluore­scent Immunoassay (FIA) hmanga hmuh 21 an ni a; mipa 699 leh hmeichhia 803 niin, mipa aiin hmei­chhia 104-in an tam zawk.

Hripui vei hmuh thar mi 1,502-te chu symptom nei 680 leh nei lo 822 an ni a; tualchhunga kái 1,497 leh tun hnaia state pawn aṭanga rawn lut panga niin, tualchhunga kái zingah kàina chin hriat loh 696 an awm.

IDSP record angin, Mizoramah Covid-19 vei 72,883 hmuh chhuah a ni tawh a, mipa 36,729 leh hmeichhia 36,154 an ni. Nimin tlai dar 5 thleng khan mi 60,152 (82.53%) chhuahtir an ni tawh a, mi 244 (0.33%) thi tawhin, enkawl mek mi 12,487 (17.14%) an awm.

September 13, Thawhṭannia sample endik dan chu - ZMC laboratory-ah Aizawl leh Serchhip district-a mi 2,612, TrueNAT hmangin district pariatah 250, RAT hmangin district 11-ah 6,160 leh FIA hmangin Aizawlah 143 a ni a; a vaiin sample 9,165 a ni. Sample endik aṭanga hripui vei hmuh chhuah 1,502 chu 16.39% a ni a; ZMC-ah 12.82%, TrueNAT-ah 23.60%, RAT-ah 14.80% leh FIA-ah 14.70% a ni.

Thawhṭannia district tina hripui vei hmuh chhuah zat chu - Aizawl district-ah mi 879, Champhaiah 144, Siahaah 101, Serchhipah 95, Lawngtlaiah 91, Lungleiah 84, Kolasib-ah 50, Mamitah 42, Hnahthialah pakua, Khawzawlah paruk leh Saitualah pakhat a ni.

Covid-19 vei hmuh thar 1,502 zingah nausen kum khat tling lo 20 telin, an zinga pasarihin symptom an nei a, symptom nei zingah a naupang ber ni 5 mi pawh a tel. Kum 70 chung lam mi 60 vel telin, a zatve velin symtom an nei a, kum 90 tling tawh mi pathum awmin, an zinga pahnihin symptom an nei.

September thla ni 13 chhungin hripui vei mi 12,883 hmuh a ni tawh a, chawhrualin ni tin mi 991 hmuh chhuah an awm ang a ni. Mizorama Covid-19 vei hmuh tawh 72,883 chu kum 2011 chhiarpui aṭanga chhutin mi 1,000 zelah hripui vei mi 68 an awm ang a ni.

Nimin khan tlai dar 5 thlengin hripui vei dam tawh mi 879 chhuahtir an ni a; Aizawl district-ah mi 661, Lawngtlai district-ah 87, Mamit district-ah 66, Kolasib district-ah 36, Serchhip district-ah 16, Champhai district-ah paruk, Hnahthial district-ah panga leh Saitual district-ah mi pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 15,719 hmuh chhuah a ni tawh a, TrueNAT-PCR hmangin 4,113, RAT hmangin 52,797, FIA hmangin 253 leh Guwahati-ah pakhat hmuh chhuah a ni tawh.