Zira'n Saitualah sorkar pisa a hawng

Land Resources, Soil and Water Conservation (LRSWC) minister R Lalzirliana chuan nimin khan a bial, Saituala LRSWC range office leh UDPA office a hawng a; Rulchawm auditorium a hawng bawk.

R Lalzirliana chuan, "Politics-a ka luh hlim leh he lai biala ka luh hlim aṭangin kan tuina ber chu district thar neih a ni ber a, a hmunhma a ṭhain a laili a, a boruak a thianghlim a, district khawpui a nih chuan Aizawl tâwt lutuk pawh a ziaawm phah ang kan ti ṭhin," a ti.

A suangtuah ṭhin district chu Saitualin a nei ta tih sawiin R Lalzirliana chuan, "Politics-a ka goal ka thlenpuinaah ka ngai che u. A la thar a, tihchangtlunna hun a la awm lo a, kan tichangtlung zel ang. Sorkar hmasaah DC leh SP chauh pawh min dahsak rawh u kan ti ṭhin a, a hlawhchham a ni," a ti.

UDPA aṭanga sum hmuh nuai 120 sénga sak Rulchawm auditorium hawnnaah R Lalzirliana chuan, September 7-9 chhunga Assembly session-ah mimal taka beihna a tâwk nasa nia sawiin, "Mahse, thu dik zîktluak loa inbeihnaah hreawm tihna ka nei lo," a ti a; Saitual district chu lungrual taka awm turin a chah a ni.