Assembly budget session a ṭiak

March 13, 2018-a ṭan, Mizoram Legislative Assembly budget session chu nimin tlai khan a ṭiak. Tun ṭum session-ah hian kum 2017-18 chhunga Mizoram budget tur pawm a ni.

Speaker Hiphei chuan House member-te an taima a, thu an awih tih sawiin, "Ni tina tih tura ruahman tizo vek thei state kan ni hi a lawmawm hle. Hei hian Mizoram leh Mizo hnam a chawimawi a ni. Tam takin zawhna ṭha takin an chháng thei hlawm a, department pahnih zawhna chháng thei lo an awm a, department hming sawi lo mai ila, anmahni an inhre mai ang. Nakinah chuan ṭhahnemngai ila ṭha ang," a ti.

Speaker tarlan danin, tun ṭum session-ah hian House-a chhan tur (starred question) 586 a lut a, 557 pawm niin, 29 hnâwl a ni a; list of bussiness-ah zawhna 208 dahin, House-ah zawhna 83 chhan hman niin, 135 chhan hman a ni lo. Ziaka chhan chi (unstarred question) 53 a lut a, 43 pawm niin, 10 chu hnâwl a ni.

Session neih chhungin report 11 present a ni a, paper 19 House-ah pharh a ni. Resolution lut 81 aṭangin pahnih sawiho a ni a, pakhat siam rema pawm niin, pakhat chu a luh anga pawm a ni. Bill lut pangate chu pawm vek a ni bawk.