NIAS, Kolkata-in cheque nung lo Mizoram sorkar hnenah an pe
Labour, Employment, Skil Development & Entrepreneurship (LESDE) minister H Rohluna chuan MNF member Lalruatkima zawhna chhangin, Nalanda Institute of Advance Stadies (NIAS), Kolkata Chairman-in cheque valid lo Mizoram sorkar hnenah a thawn thu Assembly House a hrilh a, "Cheque valid rawn thawn turin kan nawr," a ti.
H Rohluna chuan, NIAS chairman Manik Saha-a'n February 21, 2017-ah cheque 10 (post date cheque 10) Mizoram sorkar a thawn thu sawiin, "Cheque pakhat zel hi Rs. 4,20,000 a ni a, a vaiin cheng nuai 42 a ni. Hei hi Chief Minister's Office-in March 1, 2017-ah an dawng a, hemi ni vêk hian LESDE department-ah thawn chhawn leh a ni," a ti a; Manik Saha hian March 3, 2017-ah LESDE Commissioner lehkha thawn lehin, cheque a thawn tawh chu vauna hnuaia ziah a nih avangin a valid loh thu a rawn hrilh tih a sawi.
NIAS Chairman hian a cheque thawnte chu a hnena thawn let leh turin LESDE Commissioner a hrilh tih sawiin H Rohluna chuan, "Heng cheque thite hi thawn kîr a la ni lo a, pawisa a tak dawn a la ni lo. Cheque valid min rawn thawn hma chuan thawn kir loh ṭha kan ti a, valid cheque an rawn thawn theihna atan hian kan nawr ve reng a ni. A theih ang angin department-in hma a la a, NIAS-ah hian Mizo zirlai an la awm ve tho avangin, anni tana harsatna siam zawnga thil tih chu a ṭha lo," a ti.
Lalruatkima'n, Chief Minister-in NIAS-in cheng nuai 42 an rawn thawn tawh thu a sawi thu a sawi chhuah chungchangah LESDE Minister chuan, Chief Minister-in a sawi lai hian cheque hi valid lo tih hriat a la nih loh avangin thu dik tak a sawi niin House a hrilh.
H Rohluna chuan, inremnaah sum chu instalment thuma kum thum chhunga pek tur a nih laia ṭum khata NIAS hnena pawisa pek a nih chhan zawhna chhangin, "Ṭum khata an pek tlak chhan hi ka sawi thei mai lo. Instalment-a pek dan tur pawh ruahman vek a ni a, naupang 30 ang chhût a ni. Mahse, naupang 32 an zir leh si a, sum pek dan tura ruahmanna siam pawh tihdanglam a ni," a ti a; NIAS hnenah hian August 8, 2014-ah cheng nuai 66.09, September 15, 2014-ah cheng nuai 4.40 leh September 16, 2014-ah nuai 57.68, a vaiin nuai 128.19 pek a nih thu a sawi.
NIAS chungchangah hian chief minister Lal Thanhawla chuan February 23, 2017 khan NIAS, Kolkata-in an hnena Mizo zirlai 32 tirhte'n harsatna an tawh avangin Mizoram sorkar hnenah cheng nuai 42 an pek let thu thuthar thehdarhtute a hrilh tawh a ni.
NIAS-a zirlaite zangnadawmna pek an nih dawn leh dawn loh leh NIAS nena MoU anga sum inpek dan, student-te chanvo pek tura inrem ang hmalak a nih loh chhan zawhna chhangin H Rohluna chuan, "Zirlai an zirna ṭha taka zir chhunzawmte aṭangin engmah an chanvo tur an chan loh avangin hmalak a ni lo. MoU-ah zirlai zir chhuak lote zangnadawmna pek chungchang engmah ziah lan a ni lo," a ti.