Kum 2013-a zawh tur la thawk zo lo

District Council & Minority Affairs changtu chief minister Lal Than­hawla chuan MNF mem­ber Dr K Beichhua zawhna chhangin, kum 2013-a thawh zawh tura tih, CADC hnuaia Longpuighat to Kukurduleye kawng km. 36-a thui siam chu thawh zawh a la nih loh thu House a hrilh.

Chief Minister chuan, Longpuighat to Ku­­kur­duleye kawng hi No­vember 25, 2010-ah thawh ṭan a nih thu sawiin, "Kawng hi hmun thumah ṭhen a ni a, mi pathumin an thawk. Kum 2013-a zawh tura tih a ni a, a hmuna lung quarry a awm loh avangin hmun hla tak aṭanga lung lâk a ngaih avang te, fûrah kawng a nâl avangin lirthei a kal ṭhat theih loh avangte leh thil man a san zel vanga contractor-te'n an thawh ṭhat duh loh avangtein hna a chak lo. Thawh zawh hun atana ruahman hnuhnung chu December 2018 a ni a, 85% thawh zawh tawh niin an sawi," a ti.

Lal Thanhawla tarlan danin, Longpuighat - Ku­kurduleye kawng siamna atan hian cheng nuai 1,152.45 ruahman a ni a, sum hi thil dang atana hman a ni lo.