Aizawl district Employment Exchange-in Insawifiah turin department panga a hriattir

Aizawl district Employment Exchange chuan kum 2017 chhung leh kumin March thla thleng khan sorkar department panga hnenah thawktu an lâk danah Employment Exchanges (Compulsory Notification of Vacancies) Act, 1959 Section 31 kalha thil an tih avangin insawifiah turin show cause notice an pe.

Aizawl Employment Exchange hian kum 2017 chhung khan School Education department, National Health Mission (NHM) Mission Director leh Secretariat Administration Department (SAD)-te chu show cause notice an pe a; kumin bikah, January 8 khan Law & Judicial department leh March 26 khan LAD-te chu insawifiah turin an ti bawk.

Employment Exchange hotute'n Vanglaini an lo hrilh tawh dan chuan, central leh state hnuaia awm zawng zawng leh corporation leh autonomous body pawh ni se, UPSC leh Parliament bakah, MPSC leh Assembly House-a thawk tur tih loh chu Employment Exchanges (Compulsory Notification of Vacancies) Act, 1959 Section 31 angin, sorkar hnuaia thla thum aia rei thawk tur reng reng chu Employment Exchange kaltlanga lak vek tur a ni, tih a ni.

Central leh state hnuaia hna ruak awm zawng zawngah sorkar department-te'n Employment Exchange-a inziak lut koh tur a ni a, dân angin a inziak lut hmasa aṭangin post tina an mamawh ang zelin Employment Exachange-in mi 20 zel an thawn ṭhin. Employment Exchange hriattir loa chanchinbu leh TV-a advertisement tih chu dan dan zawmna a ni lo.

Aizawl Employment Exchange hian dan loa sorkar hna thawk tur la zingah, Law & Judicial department chu January 8, 2018 khan show cause notice an pe a; Law & Judicial chuan February 9, 2018 khan chhángin, an hna lak chu professional engagement chauh a nih avangin Employment Exchange kaltlang loin an la thei niin an insawi.

Hemi chungchanga Vanglaini zawhna chhangin Law & Judicial Department hotute chuan, "Assistant GA cum Assistant PP hi post awm lo a nih avangin Employment Exchange paltlang a ṭul kan ti lo. Sorkarin a rawih hun chhung tur a sawi lo a, thla khat nge, kar khat nge, thla thum nge tih pawh a hriat loh vang a ni. Vacant post reng reng chu notify a ngai tih a ni a, vacant post bik lak dawn chuan Employment Exchange kaltlang loin hna kan la ngai lo," an ti.

Aizawl district Employment Exchange-ah hian March thla tawp lam thleng khan inziak lut mi 27,820 an tling tawh a, mipa 15,882 leh hmeichhia 11,938 an ni. Inziak lutte zingah taksaa rualbanlo, physically handicapped mipa 75 leh hmeichhia 30, an vaiin mi 105 an awm a; hnam dang (Mizo ni lo) mipa 194 leh hmeichhia 109, an aviin mi 303 an awm bawk.

2017 leh 2018-a insawifiah tura tihte
# Department/Office Post hming Post zat
1. School Education Lecturer under 44
(SCERT) co-terminus
2. National Rural Health Mission MD Pharmacist 12
3. Secretariat Administration deptt. IV Grade 20
4. Law & Judicial department Asst. GA cum Asst. PP 1
5. Local Administratuion deptt. LDC 1