Ram neitute duh dan angin kan kal ang - MNF Vice President

MNF vice president R Tlanghmingthanga chuan, MNF party-in sorkarna an siam chuan mipui tan an ding dawn a, ram neitute duh dan anga an kal tur thu a sawi.

Nimina Mizo Hnam Rûna inkhawmah thu sawiin R Tlanghmingthanga chuan, "Mizorama sorkar kal tawh reng rengin an la tih ngai loh mipui rorelna kalpui kan tum. Mipui hnena thuneihna pek dan kalphung thar MNF-in a ruahmanna chu SEDP-ah telh a ni tawh a, MNF-in sorkarna a siam veleh Assembly-in a hma thei ang berin dan a siam dawn a ni," a ti.

R Tlanghmingthanga chuan, India danpui 73&74 Amendment-in a siam, Mizoram mila dan siam theih tura phalna a pek angin khawpui leh thingtlang enkawl tur tualchhung, district leh khaw (village) tinah din turin MNF-in hma thar a la dawn nia sawiin, "Chu rorelna dan thar tur chu 'The Mizoram Local Government Act, 2019' tih a ni dawn," a ti a; chu chuan khaw tinte hmasawnna a thlen dawn niin a sawi.