Assam-ah BJP an sorkar lehna atan Ramriah kan sorkar a ngawi em ni? - ZLP Leader Duhoma

ZLP chuan nimin khan Aizawl Press Club-ah thuthar thehdarhtute an kâwm a; an leader Lalduhoma chuan, BJP sorkar hnuaiah Citizenship Amendment Bill (CAB) leh National Registration of Citizens (NRC) kalpui a nih thu sawiin, "Assam sorkar chuan NRC hi kum 2013 khan a kalpui ṭan a, India khua leh tui dik tak ni lo hnawhchhuah tur mi nuai 19 chuang, an MLA ni mekte telin an awm," a ti a, NRC chu dodalna a nasat avangin Assam sorkarin chak takin a kalpui thei lo tih a sawi.

NRC hmanga hnawhchhuah turte chu district pariatah an tam zual thu sawiin Lalduhoma chuan, "Hailakandi, Karimganj leh Cachar district hi vote nei si, foreigner tam zualna a ni. Heng district pathumah hian MLA bial 15 a awm. Nakkum inthlan turah hian Congress leh AIUDF thawhho an tum a, heng mipuite hi BJP-in CAB leh NRC hmanga hnawhchhuah an tum thu an hrilh a ni," a ti.

ZLP Leader chuan, MLA bial 15-ah chêt chhiat an hlauh avangin BJP chuan mipui hîp dan tur an zawng tih sawiin, "Chuvangin, ramri buai a awm lo chungin plan fel tak neiin an rawn chê a ni. Thinghluna thlám an hâl hma September 9, 2020 khan Karimganj DC thupek angin Thinghluna IR-te'n an hmun an lo chhuahsan tawh," a ti a; Mizoram sorkar a ngawih avangin Assam an chêt zui zel thu a sawi.

Lalduhoma chuan, Karimganj DC hoa thlàm hàl a nih hnuah Hailakandi leh Cachar DC-te an chêt ve leh thu sawiin, "Ramri-ah hian kan tih hmasak a awm lo. DC pathumte hi an inthurual vek a, hmun parukah kawng an dang. Chutia kan buai laiin vanduaithlak takin Intiaz Ali, Lailapur-ah a thi a, khaw tereuhtêa mitthi chu Assam CM-in a rawn ngaihven ta em em a, rûkbo anga sawiin Chief Secretary leh DGP a tír a, Rs. 5,00,000-in an râl a ni," a ti.

ZLP Leader sawi danin, Forest Minister hoin Assam official-te'n Intiaz Ali chhungte an tlawh leh a, chumi ṭum chuan Lailapur police out post chu police station-ah hlànkai a nih tur thu an sawi. Himanta Biswa pawhin hnawhchhuah mai tura in ngaite rilru hnehna atan inthlan zawhah ramri buai chinfel a nih tur thute a sawi bawk.

Assam official leh Mizoram official-te inbiak loh mipuiin an duh laiin Mizoram sorkarin a inbiaktir zel nia sawiin Duhoma chuan, "Inbiakna a awm apiangin Mizoram official-te an dâwih a, huai takin an ṭawng ngam lo. Kawng dan avangin inbiak a ni a, Assam lam chuan lirthei an chhuah duh chuang lo," a ti a; kawng dan chu Assam sorkar hriatpuinain DC-te ruahmannaa tih a nih thu a sawi.

Lalduhoma chuan, Covid-19 SOP leh Supreme Court ruling palzûtin Assam-in NH kawngpui an dan reng thu sawiin, "Engati nge heti khawpa min tih laia kan sorkar hian eng mah a tih loh? Silchar-a tangkhangte hi ngati nge hruai chhuah a tum loh? Lailapur khaw têtaktê hi engati nge kan ngam loh?. Khu lama an ṭhiante'n 'Kan inthlang dawn a, min lo hrethiam dawn nia' an ti emaw ni le? BJP sorkar lehna atan kan ramri hi kan hralh ta emaw ni le tih hi kan zawhna a ni," a ti. 

Ramri buai chu hnam thil a nih thu sawiin ZLP Leader chuan, "Páwl leh party pawh sawi loa inràwnkhawm hun a ni. Sorkar hian tel ve an phal thlâwt lo. Assam lama an thawhpuite nen thil tih dun an tum zawk em ni? All party meeting tak ngial pawh an ko lo. Covid-19 donaah pawh min thlauhthla ṭhak tawh. Kan thilpek chiah an duh a, pawisa lo chu an la dawng duh lo zui," a ti a; party dangte an inhuam laiin sorkarin a thawhpui duh lo tih a sawi.

Lalduhoma chuan, ramri buai leh kawng dan a nih avanga harsatna Mizoramin a tawh mekah ramri hrúla cheng te, MZP, ZDU leh state páwna Zo hnahthlakte fakin, "Kan ramri buaiah hian mipui chu a hmatáwngah an ṭang char char a, sorkar chu mipui hnungah an kal ve chauh a ni. Vairengte dáia IR-te pawh sorkarin a hnûkkîr a, Vairengte mipuiin phal loin an awmna tur an sa a, an awm ve leh chauh zawk a ni," a ti.

Zawhna chhangin Lalduhoma chuan, ramri chungchangah Mizorama sorkarna chelh tawhte'n tih tak takna an nei loh thu a sawi a, "Eng emaw boruak a awmin thâwm an nei chauh ṭhin," a ti a; remna a awm hma chuan ramriah tihngaihna vak a awm loh thu a sawi.

ZLP deputy leader Vanlalhlana chuan, Brig. T Sailo chief minister a nih laiin Mizoram leh Assam inkarah buaina a awm thu sawiin, "Silchar-a Mizo awmte'n harsatna an tâwk a, kutte an tuar nasa hle. Brig. T Sailo chu Silchar-ah kal a tum a, Assam leh central sorkarin kal an phal lo a, mahse, a rilru a nawm ngang loh avangin a kal lui a, Mizote thlamuanin tangkhangte BSF-te escort-na hnuaiah a hruai haw vek. Tun ṭuma Silchar-a tangkhang mekte pawh hi armed force escort-na hnuaiah hruai kîr theih reng a 

ni," a ti.

•    Hailakandi, Karimganj leh Cachar mipui rilru hneh tumin Assam sorkar an che

•    Inbiakna a awm apiangin Mizoram official an dâwih a, Assam lam an huai

•    Kawngpui dan avangin inbiak a ni a, Assam lam chuan an dang chhunzawm tho

•    Khu lama an ṭhiante'n 'Kan inthlang dawna, min lo hrethiam dawn nia' an ti emaw ni le?

•    Sorkar hian tel ve an phal lo, Assam lama an thawhpuite nen thil tih dun an tum em ni?

•    Mipuite'n hma an táwng a, mipui hnungah sorkar a kal

•    Silchar-a Mizo tangkhangte armed force escort-na hnuaiah hruai haw theih an ni