Covid-19: Mizoram dinhmun Hripui vei 65 hmuh belh a ni

November 4, Nilaini khan Mizoramah Covid-19 vei mi 65 hmuh chhuah a ni. Nimin zing khan hripui vei mek zinga hmeichhe pakhat kum 78 mi a thi a, Covid-19 vei thi mi pahnih an awm tawh. Nimin khan fihlîm tawh mi 38 chhuahtir an ni thung.

Covid-19 vei Nilainia hmuh chhuahte chu mipa 38 leh hmeichhia 27 an ni a; ZMC laboratory-a hmuh mi 55, TrueNAT-PCR hmanga Champhaia hmuh mi pakhat leh, Rapid Antigen Test (RAT) hmanga Aizawl, Lunglei leh Lawngtlaia hmuh mi pakua an ni.

Nimin khan Covid-19 negative tawh mi 38 chhuahtir an ni a; SRH-ZMC aṭangin mi pariat, BSUP, Durtlang CCC aṭangin 26 leh, Zokhawsang CCC leh Mamit CCC aṭangin mi pahnih ve ve an chhuak.

Mizoramah Covid-19 positive mi 2,958 hmuh chhuah a ni tawh a, mipa 2,267 leh hmeichhia 691 an ni. Mi 2,958 zinga mi 2,473 (83.60%) chhuahtir an ni tawh a, mi pahnih (0.07%) thi tawhin, enkawl mek mi 483 (16.33%) an awm.

November 4, Nilaini khan ZMC laboratory-ah mi 890, TrueNAT-PCR hmangin district pasarihah mi 116 leh RAT hmangin district tinah mi 209-te swab sample endik a ni a, a vaiin sample 1,215 a ni.

Sorkar thuchhuah tarlan danin, RT-PCR hmanga ZMC laboratory-a Covid-19 positive hmuh chhuah tharte chu Aizawl district-a sample lak vek niin, mipa 32 leh hmeichhia 23, kum 6-58 inkar an ni a; mi 50 chu Mizoram chhunga kái chhâwng an nih laiin, state páwn aṭanga rawn lut thar mi panga an awm.

State páwn aṭanga rawn lut tharte chu symptom nei lo vek an ni a; an zinga pahnih - Salem Venga hmeichhia kum 24, Kolkata aṭanga lo haw leh Sihphir Neihbawiha mipa kum 24, CT Mawia Constructions hnuaia thawk, Assam aṭanga rawn lutte chu quarantine facility-a awm lai an ni. Dinthar venga mipa kum 62, Manipur aṭanga rawn lut te, Phunchawnga hmeichhia kum 30, Delhi aṭanga haw leh, Falkland Venga mipa kum 28, Assam aṭanga lutte chu home quarantine mek a ni thung.

Mizorama kâi chhâwngte dinhmun kimchang chu table-ah tarlan a ni.

TrueNAT-PCR hmangin Champhai District Hospital-ah hripui vei mipa kum 56, Champhai Electric Venga khawsa hmuh chhuah a ni a, home quanrantine lai, symptom nei lo a nih thu sorkar thuchhuahin a tarlang.

RAT hmangin Covid-19 vei mi pakua, mipa panga leh hmeichhia pali hmuh chhuah a ni a, a naupang ber kum 3 leh upa ber kum 68 a ni. Aizawlah pasarih hmuh a ni a, Lunglei leh Lawngtlaiah pakhat ve ve hmuh a ni.

Mi pakua zinga pahnih - Venghluia mipa kum 57 leh hmeichhia kum 51-te chu Delhi aṭanga haw, Lengpui Airport-ah an swab sample endik a ni a, symptom an nei lo. Mi dang pasarih chu Mizoram chhunga kái an ni thung.