SRH-ZMC-ah ICU an inchan lo nasa

Health & Family Welfare minister Dr R Lalthangliana hoin nimin khan Secretariat confe­rence hall-ah Mizorama Covid-19 donaa sorkar hmalaknate thlirho a ni a; ZMC hotute chuan, SRH-ZMC-a Covid-19 veite enkawlna ICU-ah khum an inchan loh nasat thu leh luhaithlak an tih thu an sawi.

Zoram Medical College (ZMC) hotute chuan, SRH-a Covid-19 veite enkawlna ward pariata khum awmte a khah deuh reng thu an sawi a, "Amaherawhchu, harsatna lian em em kan tâwk rih lo. ICU erawh a khat hneh hle a, khum an inchan loh nasat avangin a luhaithlak tak zet a ni," an ti.

ZMC hotute dawi danin, an zirchiannaah SRH-ZMC-a Covid-19 vanga thi zinga 55% chu kum 60 chung lam an ni a, 23% chu kum 18-44 inkar niin, 20% chu kum 45-59 inkar an ni. Thi zinga 66% chu mipa an ni a, 71.60% chu Aizawl khawpuia cheng an ni.

SRH-a Covid-19 vei thite chu chawhrualin damdawi-inah ni 11.65 chhung enkawl an ni a; thi zinga 7% chu damdawi-ina dah luh tirha symptom nei lo, a hnua harsatna neia thi zui ta an ni. Thite symptom neih langsar zual chu - khawsik, thawhah, khuh ro, SPO2 hniam, kawṭhalo, chau, hrawk ná leh taksa kham a ni.

Mitthi zingah Covid-19 ni lo, natna benvawn dang nei 80% an awm a, 76% chu positive an ni tih hmuh chhuah aṭanga ni nga chhungin SRH-ah dah luh niin, chu'ng zinga 55% chu positive tih hmuh chhuah nía dah luh nghal an ni bawk.

Ṭhutkhawmah hian, Covid-19 Medical Operational Team chair­man Dr ZR Thiamsanga, MLA, Health secretary R Lalramnghaka, Health department, Aizawl Civil Hospital, Association of Physician, Indian Medical Association, Mizoram Government Doctors’ Association leh MOT aiawhte an tel.

Covid-19 donaa hmalakna hrang hrang te, containment zone ruahman dan te, restricted area kalpui dan te, sample endik dan te, SRH-ZMC-a ICU tihlen chungchangte leh hripui kaite enkawl dan (treatment protocol)-te sawiho a ni.