Mizoramin Covid-19 kan do danah Kalphung fel lo a awm - BJP President

BJP, Mizoram Pradesh president Vanlalhmuaka chuan, Mizorama Covid-19 hripuiin kiam lam a pan thei lo chu hripui do dan kalphungah thil fel lo a awm vang nia a hriat thu a sawi.

Vanlalhmuaka hian nimin khan an pisaah thuthar thehdarhtute a kâwm a; Covid-19 donaah sorkar laipui a inhawng hle tih sawiin, "Union Health minister Mansukh L Mandaviya nen kan inkawm ṭumin Mizoram dinhmun hrang hrangte ka thlen. Ani chuan health chu state subject a nih angin state-in mamawh angte rawn thlen se, an lo puih tur thu a sawi. Kei pawhin, kan state sorkarin mamawh a thlente chu lo tihhlawhtlinsak ngei turin ka hrilh," a ti.

Sorkar laipui a inhuam em em laiin Mizoramin RT-PCR lab. pakhat chiah a la nei tih sawiin BJP President chuan, "Kan kalphung fuh lo deuh a awm a ni. Mi pakhatin RT-PCR khawl a pe a, mahse, an hmang duh lo. Tu pek pawh niin, khawi aṭanga pek pawh ni se, kan mamawh a nih miau avangin hman mai àwm. RT-PCR an politicise a, Covid-19 pawh hi an politicised em ni?" a ti a; MNF hruai Mizoram sorkar chu an tana hlâwkna awm lo tur thilpek chu ngaihsak vak loah a puh.

Vanlalhmuaka chuan, September 17 - October 7 chhungin mi dang tana luanchhuahna hun ‘Seva Aur Samarpan’ an neih dawn thu sawiin, "September 17 hi prime minister Narendra Modi pian champha a ni a, hemi pual hian Seva Aur Samarpan hi bul kan ṭan dawn. A hnathawh ropui tak avang hian India ram mipui tam tak, hnam hnuaihnung zawk te, pianphunga rualbanlo te, mi retheite leh hmeichhiate dinhmun chawisan a ni," a ti.

Vanlalhmuaka sawi danin, September 17 - October 7 chhung hian Mizoram hmun hrang hrangah mipui tan luanchhuah an tum a, programme hrang hrang an duang a ni.