Serchhipah Faina Beihpui Thlak hawng

PHE department chuan nimin aṭang khan 'Faina Beihpui Thlak' (Swachhata Hi Seva) an kalpui ṭan a; PHE Serchhip WATSAN Division pisa tualah Serchhip district MJA president Kapliana Pachuau-in a hawng.

Kapliana Pachuau chuan, Covid-19 léng karah faina kawnga hmalakna kalpui zel a ṭul tih sawiin, "Covid-19 laka himna atan pawh faina ngaih pawimawh a ṭul," a ti a; faina kawnga mipui hmalakna chuan India chu khawvel ram ropui zingah a siam mek tih sawiin, faina kawnga theihtawpa hma la zel turin mipui a sáwm.

Serchhipa PHE executive engineer F Lalsanglura chuan, faina lamah mipuiin thâ an thawh zel theih nan sorkar hmalaknate mipuiin an hriat a ṭul thu a sawi a; chanchinbumite chu faina lama sorkar hmalaknate a zau thei ang bera puangzar ṭhin turin a ngen.

District coordinator Samuel Lallawmzuala sawi danin, Swachhata Hi Seva hian September 15 aṭanga October 2, 2021 thleng a awh dawn a, a bul ṭanna, nimin khan district hmun hrang hrangah faina kawngzawh (rally) buatsaih a ni. September 17-ah khaw hrang hrangah faina hnatlangpui neih tur a ni a, September 20 aṭangin ODF+ target village-ahte awareness campaign neih a ni ang.

Hawnna inkhawm zawhah Faina Beihpui Kawngzawh (Satyagrak Se Swachhagrah Rath Yatra) neih a ni a, Serchhip College zirlai te, PHE department-a thawkte leh tualchhung thuthar thehdarhtute an tel a ni.