Kum khat chhungin buh ṭum hnih thar theih dan tur kan ngaihtuah - Agriculture Minister
Agriculture minister C Lalrinsanga chuan, kum khat chhunga buh ṭum hnih thar theih dan tur an ngaihtuah tih a sawi a, "Nakkumah bul ṭan tumin hma kan la," a ti.
Vanglaini palaiin a kawmnaah C Lalrinsanga chuan, "Kut hnathawktute'n kum khata buh vawi khat an thar hi a duhkhawpawm lo deuh. Chuvangin, solar water pumping hmangin leilet neite'n kum khatah ṭum hnih buh an thar theih nan hmalak a ni," a ti a; kum khatah buh ṭum hnih thar theih a nih chuan zau zawka hmalak chhunzawm an tum thu a sawi.
Agriculture Minister chuan, Mizoramah chuan October vel aṭangin leiletah tui hmuh tur a awm tawh mang lo a, chutih laiin, hmun eng emaw zatah chuan leilet bul lawka luiah tui a luang reng ṭhin tih a sawi a, "Leilet hnaiha lui luang hi solar water pumping hmangin leiletah lak luh a nih chuan ṭhál lai pawhin leiletin tui a hmu ṭha ang a, buh a thar leh theih dawn a ni. Solar water pumping nena ṭan kawp chuan February velah buh a phun leh theih beisei a ni," a ti.
He hmalakna atan hian district hrang hrangah coordination committee din a ni a, kumin chhungin ṭhal laia tui hmu ṭha lo leilet, a bul hnaia lui tui ṭha site solar water pumping hmanga lak theih tur an zawng dawn a ni.
C Lalrinsanga chuan, phase-I atan solar pumping khawl 200 leina tur an neih tawh thu sawiin, "Buh chíng kher lo thlai chíngtute zingah pawh dil an awm a, anni pawh hian solar water pumping hmangin hlâwk zawka thlai an thar theih a rinawm. Scheme hnuaia senso chu central-in 50%, state sorkarin 30% leh a dawngtu turte'n 20% an tum tur a ni a, central leh state share tur neih a ni tawh," a ti.
Kum khata ṭum hnih buh thar tuma hmalakna chu kum 2022-ah kalpui an duh thu sawiin Minister chuan, "Committee chuan hmalakna hmun tur kumin chhung ngeiin an thlang ang," a ti a, khawl bun hna chu empanelled firm zinga miin an thawh dawn thu a sawi.
C Lalrinsanga chuan, state sorkarin 30% a tum a ngaihna project Mizoramah kalpui a nih ngai loh thu sawiin, "Chief Minister-in kuthnathawktute a ngaih pawimawh em avangin min remtihsak a ni," a ti.
Agriculture Minister chuan, Thingdawlah alu chi siamna buatsaih an tum thu sawiin, "Alu chi hi tissue hmanga siam tum a ni a, a dinna tur cheng vbc. 2 kan nei tawh," a ti a, a rang thei ang bera bul ṭan an tum thu a sawi.