KHAWTHLIR

CM-in vai liam
Nimin khan chief minister Zoramthanga chuan district hrang hranga primary health centre (PHC) leh community health centre (CHC) 14 hnena pek tur oxygen concentrator 33 a vai liam. Oxygen concentrator-te hi ICICI Bank Ltd. in an corporate social responsibility kaltlanga CHC leh PHC hrang hranga hman turin Directorate of Health Services hnenah an pe a ni.

Thisen pe
NCC 20th Battalion, Aizawl chuan nimin khan ZMC Blood Bank-ah thisen unit 23 an pe a, petute mipa 21 leh hmeichhia pahnih an ni.

Online zirna sawiho
Human Resources Development Board chuan nimin khan middle school leh high school-a science leh mathematics zirtirtute tan hripui lên laia online-a zirna kalpui dan ṭha inzirtirna webinar an buatsaih a, School Education secretary Dr Lalzirmawia Chhangte-in hmanpuiin, zirtirtu 800 chuang an tel a ni.

Swab endik rûnpui
Siaha khawpuiah nimin khan swab sample endik rûnpui neih a ni a, vawiinah chhunzawm a ni ang. Endik rûnpui nei tur hian Aizawl aṭangin IDSP nodal officer Dr Pachuau Lalmalsawma leh entomologist Lalfakzuala Pautu bakah, laboratory technician 22 leh thawktu dang 19 an kal a; an zinna senso chu minister Dr K Beichhua, Siaha bialtu MLA-in a tum vek a ni.

Mobile phone sem
Minister R Lalzirliana chuan nimin khan Saitual Joint VC House-ah a bial Ṭawi huam chhunga zirna-in hrang hranga zirlai harsa 50 hnenah online class kalna tur mobile phone a sem. R Lalzirliana hian Saitual DC pisa sak mek a tlawh bawk.

RAT phalna pe
Health & Family Welfare department chuan Lungleia Faith Hospital chu rapid antigen test (RAT) hmanga swab sample endik phalna an pe thar.