Hripui vei hmuh thar 65 zingah Tualchhunga kái mi 58 an awm

November 4, Nilainia Mizorama Covid-19 vei hmuh chhuah mi 65 zingah Mizoram chhunga kái mi 58 an awm a, Aizawla veng 12 leh zirna hmun pahnih leh, Aizawl páwn lam khaw pathuma mite an ni.

Mizorama kái hripui vei hmuh thar mi 58 zinga pasarih chu an kai ṭanna hriat a ni lo a, mi dang 51 chu an kàina hriata ngaih a ni. Taksaa harsatna nei (symptom lang) mi 11 an awm.

Mi 58 zinga mi 28 chu Staines Memorial School, Chanmari-a awm an ni a, thawktu (staff) pathum leh hostel-a awm zirlai 25 an ni. Zirlaite chu Chan­mari, Edenthar Veng, New Capital Complex, Venghnuai, Muallungthu, Rúllàm, Dàrlawng, Ser­chhip (mi 2), Mamit, Cherhlun, Champhai, Hortoki, Kawnpui, Siaha (mi 2), Siachangkawn, Saipum (mi 2), Kolasib, Mualvùm, Buarpui, Zawl­nuam, Khankàwn leh Chhingchhipa mite an ni.