Thla khata Re 1 dawng tur secretary rank ruat

Mizoram sorkar chuan Officer on Special Duty (OSD) to Chief Minister atan Rosangzuala s/o F Lalsanga (L), Luangmual, Aizawl a ruat thar. OSD to CM hi state sorkara secretary tlukpui a nih rualin, lawmman atan thla khatah Re 1 chiah a dawng dawn.

Department of Perso­nnel and Adminis­trative Reforms (DPAR) secretary K Lalthawm­mawia'n September 14, 2021-a hriattirna (notification) a tih­chhuaha a lan danin, OSD to CM Rosangzuala chu lawmman/hlawh (honorarium) atan sorkar aṭangin thla khatah Re 1 (cheng khat) dawng tura tih a ni a, Mizoram sorkara secretary tlukpui (rank)-in a awm dawn a ni. A awmna hmunpui (headquarters) chu Aizawl a ni ang a, engtik hunah pawh chawlhtir (terminate) theih a ni thung.

Thu dawn danin, Ro­sang­zuala hi MNF Gene­ral Headquarters-ah adviser a ni a, kum 2004-a Lok Sabha inthlanpuiah Outer Manipur bialah candidate a lo ni tawh. Kum 2004 Lok Sabha inthlana affidavit-a a lan danin, affidavit siam lai, March 29, 2004-ah kum 43 mi a ni.