LS MP-in MHA hotute a kâwm

Lok Sabha MP C Lalrosanga chuan New Delhi-ah Union Home secretary (Border Ma­nage­ment) Sanjeeva Kumar leh additional Home secretary (North East) Piyush Goyal te a kâwm a; tun hnaia Myanmar aṭanga Mizo­rama râltlânte chung chang a sawipui.

Sorkar thuchhuah tarlan danin, C Lalrosanga chuan, kumin kum tir aṭanga Myanmar ram buai vanga Mizorama tlân lutte enkawlna leh chhawmdawlna ngaihtuahpui tur leh sum leh pai bakah, damdawi leh mamawh dang atana ṭanpuina awm thei ang ang ngaihtuahsak turin Home Ministry hotute a ngen a ni.

Mizoram leh Assam ramri buai chungchang pawh MHA hotute sawipuiin C Lalrosanga chuan, chinfelna atan chak taka hma la tur leh theihtawp chhuahpui turin a ngen a; ramri hrûl hmunte tihmasawn tura hmalak chak a ṭul thu te, sum tam zawk leh ngaihtuahna tam zawk seng tura a duh thute a sawi bawk.

C Lalrosanga hian Mizorama Police Service officer-te all India service-a an kaisanna tur tihkhawtlai nia a hriat thu sawiin, MHA Secretary chu enfel rang turin a ngen nghal a ni.