Lungleia RT-PCR laboratory din tura Hma an lak dan HFW-in an sawifiah

Health & Family Wel­fare (HFW) department chuan, High Court thupek bawhzuia Lungleia RT-PCR Laboratory din tura hma an lak dan tarlangin, Lunglei Tourist Lodge-a RT-PCR laboratory dinna turin estimate siam a nih tawh thu an tarlang.

Nimina HFW thu­chhuah tarlan danin, Guwahati High Court, Aizawl Bench chuan sorkarin Lungleia RT-PCR lab. tur a ruahman mek sak zawh a nih hmaa hman lailâwk turin RT-PCR lab. din a remchan dan ngaihtuah turin thu a pe a; August 9, 2021-ah HFW Principal Director kaihhruai committee din niin, committee chu August 10 khan tilianin member ruat belh a ni.

Committee chuan August 13-ah Lunglei an tlawh a, Tourist Lodge an enfiah. Committee-a tel Lunglei Civil Hospital Medical Superintendent chuan Lungleia mimal leh sorkar building ruak remchang dang nia an hriatte a dawr tawh thu a sawi. Mahse, chu'ng in ruakte chu a neitute'n an remtih loh avangin Tourist Lodge-ah RT-PCR lab. din tura hmalak mai an rel a, sorkarah inspection report chipchiar tak ziakin an thehlut a ni.

Report an thehluh chu September 7, 2021-ah bawhzui lehin, Tourism department-ah Lunglei Tourist Lodge hman phal dilna ziakin an thlen a; ṭawngka chuan phalna an hmu tawh a, ziaka phalna leh chhanna an ngaichâng mek.

RT-PCR lab. chu damdawi-in páwna din tur a nih vangin September 7, 2021-ah Indian Council of Medical Research (ICMR)-ah dilna thehluh a ni a, chumi hnu September 10-ah lehkha thawn nawn leh niin, ICMR chhanna ngaihchàn mek a ni.

Health department chuan, Lunglei Tourist Lodge-a RT-PCR lab. dinna turin estimate siam a ni tawh nia tarlangin, "Room layout, hmanrua leh bungraw mamawhte pawh ruahmanna siam vek tawh a ni. Tourist Lodge panna kawng a ngheh loh avangin lirthei tlàntir a him lo a, ICMR aṭanga phalna hmuh a nih veleh siam ṭha tura dilna Mizoram sorkarah thlen a ni ang," an ti.