Sorkarna kan siam chuan eirûk kan khap ang - ZPM Working President

ZPM chuan nimin khan an pisaah an party zawm thar lawm luhna inkhawm an buatsaih a; lawm luttu ZPM working president K Sapdanga chuan, sorkarna an siam chuan thuneihna hmangin eirûk an khap tur thu a sawi.

K Sapdanga chuan, an sorkar a nih chuan minister-te bathlàra thlawhhma neih ang chi tihbo an duh tih sawiin, "Corruption hi do ngawt loin, thuneihna hmangin kan khap ang a, thuawih lo chuan dan an hmachhawn mai turah kan ngai. Chumia min venpui tur chuan sorkar laka hamṭhatna dawng hauh lo tura intiam Val Upa Council kan nei a, kan thlamuang em em. Hlemhlêtna a chhîp aṭanga ṭhuaiin, hmasawnna erawh a mawng aṭangin kan dâwm kâng ang," a ti.

ZPM Working Presi­dent chuan, sorkar duh vanga Pathian pawi khawih thei khawp hman­raw hman an duh lo tih sawiin, "He ram hian sorkar thar hrim hrim a mamawh lo a, huaisen taka kalphung dik zawka rorel ngam sorkar thar a mamawh a ni," a ti a; ṭhangtharte thlamuang taka an muthilhsan theihna ram siam tur leh mi tin lungawina tling ram rorelna din tura theihtawp chhuah turin ZPM mite leh mipui a sáwm.

ZPM chu Mizorama ram rorel ṭha a awm duh vanga awm khawm an nih thu sawiin Sapdanga chuan, "He ram hi kan tu leh fate seilenna tlak a nih theihna tura rualawt ngawih ngawih kan tam tawh kan hotute'n an ring. Mi zawng zawng leng turin movement báwm lian tak siam a ni a, lo lut khawm a, rawn kaihruai turin mi zawng zawng kan sawm a ni. A láwi hmasa berte pawhin kum li hmel kan hmu ṭan chauh a, inchhuang bik tur kan la awm lo. Hnuhnung deuha inngaia inkiltawih tur kan awm hek lo," a ti.

ZPM Working President chuan, Mizoramah kalphung thar, mipui sorkar tun din tumin an au ṭhin tih sawiin, "Pathianin neutral mipui thinlungah min thawhsak a nih kan ring, pian hlimah general election kan hmachhawn a, bial riat ngawtah mipuite'n hnehna min pe. Kan tlinna Serchhip bialah chhan mak tak avangin by-election neih a ni a, Pathianin mipui hmangin hnehna min pe leh a ni," a ti a; an khingpuite diriam zawnga an awm palh a nih chuan Pathian leh an khingpui ngaihdam a dil.

Lawm luh inkhawm hi ZPM vice president Lalthansanga'n a kaihruai a, an party-ah mi paruk an lawm lut. Lawm luh zingah hian Aizawl West-II chhunga Congress party hruaitu hlui leh advocate-te an tel a ni.