COVID-19: Mizoram dinhmun ; Hripui vei 1,185 hmuh belh a ni

September 14, Thawh­lehni khan Mizoramah Covid-19 vei mi 1,185 hmuh chhuah a ni a, India rama hmuh belh tam lamah palina a ni. Nimin khan hripui vei dam tawh mi 624 chhuahtir an ni a, mi pathum an thi.

Covid-19 vei hmuh tharte chu mipa 583 leh hmeichhia 602 an ni a; ZMC laboratory-a hmuh chhuah 188, TrueNAT hmanga hmuh 77, RAT hmanga hmuh 893 leh Fluorescent Immunoassay (FIA) hmanga hmuh 27 an ni.

Hripui vei hmuh thar mi 1,185-te chu symptom nei 609 leh nei lo 576 an ni a; tualchhunga kái 1,178 leh tun hnaia state pawn aṭanga rawn lut pasarih niin, tualchhunga kái zingah kàina chin hriat loh 434 an awm.

IDSP record angin, Mizoramah Covid-19 vei 74,068 hmuh chhuah a ni tawh a, mipa 37,312 leh hmeichhia 36,756 an ni. Nimin tlai dar 5 thleng khan mi 60,921 (82.25%) chhuahtir an ni tawh a, mi 248 (0.33%) thi tawhin, enkawl mek mi 12,899 (17.42%) an awm.

September 14, 2021-a Covid-19 vei hmuh thar 1,185 zingah nausen kum khat tling lo 15 telin, an zinga pakuain symptom an nei a; thla khat la tling lo nausen panga awmin, an zinga pahnihin symptom an nei. Kum 70 chung lam mi 50 vel telin, a zatve velin symtom an nei a, kum 90 tling tawh mi pahnih awmin, pakhat zawkin symptom a nei a ni.

Thawhlehnia Mizorama Covid-19 vei hmuh chhuah zat 1,185 chu India rama state leh union territory 36 zingah hmuh tam lamah palina a ni a; Mizoram aia hmuh tamnate chu - Kerala-ah mi 15,876, Maharashtra-ah 3,530 leh Tamil Nadu-ah 1,591-te a ni. Nimin zinga report tihchhuahah, Mizoram chu hripui vei enkawl mek tam lamah parukna a ni zui zel bawk.

September thla ni 14 chhungin hripui vei mi 14,068 hmuh a ni tawh a, chawhrualin ni tin mi 1,004.86 hmuh chhuah an awm ang a ni. Kum 2011 chhiarpui aṭanga chhutin Mizorama Covid-19 vei hmuh tawh 74,068 chu mi 1,000 zelah hripui vei mi 68 an awm ang a ni a; mi 1,00,000 zelah Covid-19 vangin mi 22 an thi tawh ang a ni.

Nimin khan tlai dar 5 thlengin hripui vei dam tawh mi 624 chhuahtir an ni a; Aizawl district-ah mi 236, Champhai district-ah 156, Mamit district-ah 113, Kolasib district-ah 93, Lunglei district-ah 15 leh Lawngtlai district-ah mi 11 an chhuak.

IDSP tarlan danin, September 14, 2021 thlengin Mizoramah swab sample 9,83,918 endik a ni tawh a, chu'ng aṭanga Covid-19 vei hmuh tawh zat 74,068 chu 7.53% a ni. Hripui vei hmuh tawh zinga mi 69,659 chu Mizoram chhunga kái chhâwng an ni a, mi 4,409 chu Mizoram páwn aṭanga an rawn luh hnua hmuh chhuah an ni.