Secretary tlukpui ni tura OSD atana MNF Adviser ruatna sût turin ngen

Mizoram Pradesh Congress Committee (MPCC) chuan thuchhuah siamin, MNF sorkar hnuah Mizo ṭhalai lehkhathiamte tana beidawnna tur thil a thleng ta fo tih an tarlang a; secretary thlukpui officer ni tura MNF adviser Rosangzuala ruatna chu sût turin sorkar an ngen.

DPAR secretary K Lalthawmmawia chuan September 14, 2021 khan notifi­cation chhuahin, Rosangzuala s/o F Lalsanga (L), Luangmual, Aizawl chu Officer on Special Duty (OSD) to Chief Minister atan a ruat a nih thu a tarlang. Notification-a a lan danin, Rosangzuala chu thla khatah Re 1 (cheng khat) chauh hlawh tur a nih laiin, secretary rank a ni thung.

MPCC chuan, eng sorkar hnuaiah pawh CM puitu tur adviser leh a dangte ruat chu kalphung pangngai a nih thu an sawi rualin, "IAS leh MCS senior post tur ni àwm tak, Officer on Special Duty atana MNF Gen.Hqrs-a Adviser dah a ni hi chu thil thleng ngai lo tak a ni. Mizo ṭhalaite competitive exam hmachhawn tura kan infuih lai mek leh Mizoram Youth Commission pawhin a bika training pek eng emaw zat a neih laia officer post-a MNF Adviser dah a ni hi a mak tak zet a ni," an ti.

MNF sorkarah ṭhalai lehkha­thiamte tana beidawnna tur thil a thleng fo tih sawiin MPCC chuan, "Congress sorkarin MPSC kaltlanga dik taka sorkar hnathawktu tur a lak ṭhinte duhkhawp loin Mizoram Subordinate Service Selection Board din a lo ni tawh a, advertisement pawh chhuah loin zirtirtu leh sorkar hnathawk dang za tam tak an la tawh bawk," an ti a; MNF sorkar chêt dan chuan Mizo ṭhalai lehkhathiamteah beidawnna a thlen an hlauh thu an sawi.

Congress party chuan, Congress sorkar laia MPSC kaltlanga dik taka sorkar hnathawk lâkna tam zawk kalpui ṭhin a nih thu sawiin, "Ṭhalaite tan intihsiakna thianghlim a buatsaih ṭhin chu MNF sorkar hian a tichhe mek. Tuna appointment mak tak a pek pawh hian Mizo officer rualte leh ṭhalai lehkhathiamte a tihhnual kan hlau hle a, appointment hi sût leh turin MNF sorkar kan ngen a ni," an ti.