Covid-19 vangin mi 248 thi tawh

Nimin khan Covid-19 vei mi pathum an thi a, September 14, Thawhlehnia thi nimin tlaia sorkarin a tarlan belh mi pakhat a awm bawk. Sorkar chhinchhiah angin, Mizoramah Covid-19 vangin mi 248 an thi tawh a, September thla bikah ni 15 chhungin mi 31 an thi tawh.

Lalchawii (88), Ramthar North, Aizawl chu September 14, Thawhlehni chawhma dar 10 khan an inah a thi. Covid-19 positive a ni tih September 7 khan hmuh chhuah a ni a, inah an inenkawl a, damdawi-inah dah a ni lo. Thu dawnna chuan, Lalchawii hi tar chak lo, hun rei tak chhuakvâk tawh lo a nih thu a sawi.

Covid-19 vei enkawl lai Lianthangi (61), Chaltlang, Aizawl chu nimin zing dar 2:10 khan State Referral Hospital-ah a thi a, hripui vei a ni tih September 6 khan hmuh chhuah niin, September 8 aṭangin SRH-ah enkawl a ni.

Nimin chhun dar 12 khan Lalnunfela (18) c/o R Vanlaldika, Durtlang chu an inah a thi a; amah hi cancer vei, lâk sawn ngam a nih tawh loh avanga ina inenkawl an nih thu Durtlang khawtlang hruaitute chuan an sawi. Covid-19 vei a ni tih September 7-ah hmuh chhuah a nih thu sorkar thuchhuakin a tarlang.

Vanlalhruaia (44), Armed Veng South pawh nimin tlai dar 4:45 khan hripui vangin SRH-ZMC-ah a thi a, hripui vanga thi 248-na a ni. Covid-19 positive a ni tih September 8-ah hmuh chhuah a ni a, SRH-ah dah luh nghal a ni.