Assam nena ramria buaina vangin Central-in Mizoramah BSF dah dawn

Sorkar laipui chuan Mizoram leh Assam ramri vela buaina avangin Mizoramah Border Security Force (BSF) company thum a dah dawn. Assam sorkarin Mizoram nena inrìnaah central armed force dah a rawt a, Mizoram sorkar erawh chuan ṭul a tih ve loh thuin an chháng tih, chief secretary Lalnunmawia Chuaungo chuan a sawi.

Nimina MJA hruaitute'n an kawm­naah Lalnunmawia Chuaungo chuan, Assam sorkarin ramria central armed force dah turin Ministry of Home Affairs (MHA)-ah an thlen thu a sawi a, "Mizoram sorkar chuan ramri bul hnaia central armed force dah hi ṭul a tih loh thuin a chháng. Mahse, central sorkarin ṭha ber tura a ngaih avangin BSF company thum, Nagaland, Assam leh Meghalaya aṭangin rawn dah a tum," a ti.

Chief Secretary chuan, tuna ramria harsatna la awm chhan ber chu Assam sorkarin an constitutional boundary huam chhunga an ngaiha Mizoram police awmte hnuhkìr an phût vang a nih thu sawiin, "A hmanrua atan civil mite an hmang mai zawk a ni," a ti a; Mizoram sorkar chuan a mite thlabár tur vèn nan an hnuhkîr theih loh thu a sawi.

MHA lamin Assam an nawr nasa nia sawiin Chief Secretary chuan, "An constitutional boun­dary-a an ngaih chhunga kan police-te la awm chunga kawng dan tihtawp chu tlàwmthlak an ti ve laklawh a ni. Tlém tlém tal pawhin hnûkkîr turin min rawn ngen a, inbiakte rawtin, Aizawl lama rawn kal an hnial loh thu thlengin an sawi. Inbia pawh ni ila tun dinhmunah chuan eng nge kan sawi chuan ang, tih hi kan ngaihdan a ni," a ti.

Kolasib DC Dr H Lal­thlangliana pawhin nimina Kolasib-a thuthar thehdarhtute a kawmna­ah, BSF company pathum Kolasib district-a awm tura ruahmanna a awm thu a sawi a, "Kolasib khaw chhung hmun pahnihah leh Bilkhawthlirah dah an ni dawn a, Vairengteah CRPF an awm mek bawk. Heng hmunte hi quarantine facility ang chiaha enkawl tur a ni," a ti. Bawrhsap hian rálkhêl lo turin mipui a ngen nghal a ni.