Covid-19 vei pakhat thih belh

Covid-19 vei State Referral Hospital (ZMC)-a enkawl mek Darhawni (78), Durtlang Leitan chu nimin zing dar 1:30 khan a thi a, Mizoramah Covid-19 vei enkawl lai thi pahnihna a ni.

Sorkar thuchhuakin a tarlan danin, Darhawni hian Covid-19 a vei tih October 21 khan Rapid Antigen Test hmangin hmuh chhuah a ni a, SRH-ZMC-ah hruai nghal niin, a tìrah chuan Isolation Ward-ah enkawl a ni. October 23-ah intensive care unit (ICU)-ah dah luh a ni a, ICU-a a awm aṭanga ni 14-naah a thi a ni. 

Darhawni hi nimin khan Durtlang Leitan LC Basketball Court-ah bialtu pastor Rev. R Lalhmangaiha'n a vui a, a vuinaah hian mi eng emaw zat an tel.

Durtlang Leitan Local Task Force chuan nimin khan thuchhuah siamin, "Tukin zinga kan veng chhunga chhiat tâwkte hi Leitan LLTF-te'n thinlung takin kan tuarpui tak zet a ni," an ti. SRH-ZMC lamin an hriattir ang leh sorkar thupek angin, chhiat tâwk chhungkuate chu ni sarih - November 5-11, 2020 chhung an veng chhung mite'n lèn pawh loh turin an ngen/hriattir nghal a ni.

Zawhna chhángin Leitan Branch YMA Pre­sident chuan, Dar­hawni fanu leh an monu pawhin Covid-19 an vei tih hmuh chhuah a nih tawh thu sawiin, "An monu hi kar khat vel kal ta khan a negative tawh a, a fanu pawh tukin (Ningani)-a result chhuakah khan a negative a, a nu hi a rawn zui haw nghal," a ti.

YMA President chuan, Darhawni fanu chu negative tawh mah se, sorkar thuchhuak angin inkhung hran ngai an la nih avangin lènpawh a rem rih loh thu leh, inkhung hran hun a zawhah YMA hminga ràlna pawh an nei tura a ngaih thu a sawi a; Darhawni kuang chu SRH-ZMC-in an buatsaih a nih thu leh Rs. 5,000 man a nih thu a sawi bawk.

Darhawni thih chungchangah hian Health minister Dr R Lalthangliana chuan thuchah tichhuakin, "ZMC-a Covid-19 positive enkawl lai Pi Darhawni, Leitanin min boralsan ta mai hi pawi ka ti a, a chhungkhat laináte thinlung takin ka tawrhpui a. Amah enkawltute'n theihtawp an chhuah tih ka hriatin an chungah lawmthu ka sawi a ni," a ti.