Thisen pe ṭhate hnenah chawimawina hlàn

Association for Voluntary Blood Donation (AVBD) chuan nimin khan HYVE Hall, Aizawlah kum 2020-21 chhunga páwl hminga thisen pe ṭhate chawimawina hun an hmang a, Health & Family Welfare minister Dr R Lalthangliana'n a hmanpui.

Thisen pe ṭhate chawimawina inkhawmah hian Health Minister-in thu a sawi bakah, chawimawina dawngtute hnenah lawmman a hlan a; AVBD president C Lalnunnema'n inlawmna thu sawiin, AVBD vice president Dr Zoramdinthara'n thisen pek kawnga ṭhalaite fuihna thu leh thisen pe tura sawmna thuchah a sawi.

Dr R Lalthangliana chuan, mihring dam chhung tâwi têah lainatna, khawngaihna leh hmangaihnaa mahni mihringpuite rawngbàwlsak tluka pawimawh a awm lo tih sawiin, "Ringtu kan nihna aṭanga kan mihringpuite hmangaihna kan lan chhuahtirna kawng pawimawh leh ropui tak chu a thlàwna mamawhtute hnena thisen pek hi a ni," a ti.

Health Minister chuan, Covid-19 hripuiin Mizoram a nuai avangin nikum aṭangin a thlàwna thisen pek a tlahniam tih sawiin, "AVBD-te'n theihtawp chhuaha ṭan lain, kohhran leh pawlte an rawn pên chhuak a, mualpho lutuk loin kan kal theih phah a ni," a ti a; tlawmngaia thisen petute zawng zawng chungah lawmthu sawiin, thisen pek uar zel turin a chah.

AVBD president C Lalnunnema chuan, AVBD thil tum ber chu - thisen mamawhte'n a hun taka a thlawna thisen an dawn theih leh voluntary donation 100% tlin a nih thu a sawi a; a thlàwna thisen pekah Mizoram chu India rama ti ṭha berte zinga mi a nih thu sawiin, "Mizo hmeichhiate'n thisen pekah an thawh hlâwk hle a, India ram pumah hmeichhiate pek chu 5% chauh a nih laiin, Mizoramah chuan hmeichhiate pek hi 25% - 30% a tling pha a ni," a ti.

AVBD general secretary Lalrinkima tarlan danin, kum 2020-21 chhungin Mizoramah thisen unit 26,704 pek a ni a, chu'ng zinga unit 23,949 (89.68%) chu voluntary donation a ni. Pawl hrang hrangte pek zat belhkhawm chu unit 18,200 a ni a, mimalin a thlawna an pek chu unit 8,504 (31.85%) a tling.

Kohhran ṭhalaite'n unit 9,861, zirna-inte'n unit 2,362, YMA hmingin unit 1,942 leh páwl dangte'n unit 4,035 a ni a; pawl hminga pek hi unit 18,200 a ni. Pawl hming ni lo, mimala pek unit 8,504 (31.85%) a awm a, a vaiin unit 26,704 a ni.

AVBD hi May 10, 1991-ah din a ni a, Aizawl bakah blood bank awmna district dang pasarihah branch an nei. Kum 1993 khan voluntary blood donation chu 1.79% a ni a, kum 2020-21 ah 89.68% a tling tawh a, a san ber kumah 91% a tling.