JJM sawihonaah Dy. Chief Minister a tel

Nimin khan Guwa­hati-ah Union Jal Shakti minister Gajendra Singh Shekhawat hoin hmarchhak state tan Jal Jeevan Mission (JJM) sawihona buatsaih a ni a, Mizoram aṭangin PHE enkawltu deputy chief minister Tawnluia a tel.

Tawnluia chuan, Mizo­ramah mihring chenna khua/hmun 722 a awm thu sawiin, "Hengah hian chenna in 1,33,132 a awm a, August 31, 2021 thleng khan chenna in 58,869-ah tui thianghlim herh haw theiha siam (FHTC) a ni. Kum 2021-22 chhung­in in 40,000-ah tui thiang­hlim herh haw theiha siam leh tum a ni a, a bak zawng in 34,263 chu kum 2022-23 ah siam a ni ang," a ti.

Kum 2019-20 aṭanga 2021-22 chhunga sorkar laipuiin sum a la pek chhuah lohte tarlangin Tawnluia chuan, "FHTC hi kum 2022-23 ah zawh hman tum a ni a, chumi atan chuan a hmaa sorkar laipuiin a la release lohte nen cheng vbc. 918.45 mamawh a ni," a ti a; JJM scheme-te tihlawhtling ngei turin sorkarin theihtawp an chhuah tih a sawi.

Ni khat awh confe­rence hi hlawm hniha ṭhen a ni a; PHE secreta­ry Lal­muanzova, PHE engi­neer-in-chief C Lalremsiama­ leh official dangte'n an ṭawiawm. Sikkim tih loh hmarchhaka JJM changtu minister-te an tel kim.