CYMA-in ráltlân chhawmdawlna Ngaihtuahpui turin CM an ngen

Central YMA hruaitute chuan September 15, Nilaini khan chief minister Zoramthanga a pisaah an kâwm a; Myanmar aṭanga Mizorama rawn ráltlânte chhawmdawlna ngaihtuahpui turin an ngen.

CYMA hruaitute hian Chief Minister chu ráltlânte chhawmdawlna hrang hrang state sorkar aṭanga ngaihtuahpui tur te, ráltlânte swab sample endikna hmanrua ngaihtuahsak tur te, Myanmar ráltlânte chungchangah sorkar laipui hotute hma la ngei tura sawipui turin an ngen a ni.

Chief Minister leh CYMA hruaitute hian Mizoram sorkar hotute leh YMA hruaituten ráltlânte mamawh an sawiho a, hmalak hmanhmawh ngaiah hmalak ṭha an ti.

September 15 vek khan CYMA hruaitute chuan Mizoram chief electoral officer Jawahar P chu a pisaah an kawm a; Special Summary Revision of Electoral Roll chungchang sawipuiin, Bru zinga anmahni duh thua Tripura-a chhukte chu elector roll aṭanga paih a ṭul thu an hrilh a ni.