Minister-in NITI Aayog CEO kâwm

Minister of state Robert Romawia Royte chuan nimin khan New Delhi-ah NITI Aayog chief executive officer Amitabh Kant a kâwm a, Mizoramin chak zawka hma a sawn theih nana hmasawnna sum lian tham a mamawh dante a sawipui.

Robert Romawia Royte hian ministry hrang hrang hnuaia scheme aṭanga sum a tam tâwk theih loh avangin Mizoram hmasawnna project hrang hrangte chu Externally Aided Project (EAP) aṭanga pek vat a nih theih nan ṭan la turin a ngen a; Amitabh Kant chuan, rang taka hma a lak nghal tur thu a lo hrilh.

Minister hian Union Sports secretary Ravi Mittal pawh a kâwm a, hun rei lo te chhunga Mizoram tana sum a sanction sak chu lawmawm a tih thu hrilhin, DPR a thehlut nghal a ni. Robert Romawia hi Sports & Youth Services secretary H Lalengmawia'n a ṭawiawm.