Ramria duty-te ngaihsak turin sorkar ngen

ZPM party chuan thuchhuah siamin, Mizoram leh Assam ramri hnaiha Mizoram police duty-te tan a rang thei ang bera tui thianghlim in tur leh ei rawngbawlna turte leh power supply-te ngaihtuahsak tur leh an hriselna dinhmun enfiahsak thuai turin Mizoram sorkar an ngen.

ZPM chuan, an hruaitu ṭhenkhatte'n September 11, 2021 khan Assam hnaih khua - Saihapui-V, Buarchep leh Chuhvela Mizoram police duty-te an tlawh a, Mizoram police leh Assam police-te dinhmun an enfiah a ni.

Buarchepah Mizoram police-te duty-na aṭanga hmuh phâk rengah Assam-in ramri-ah kawng an laih bakah luiah lei an dawh tih sawiin ZPM chuan, "Assam sorkar thil tih dan a makin demawm kan ti hle. Mizoram police duty-te erawh an phûrin hmuh an nuam hle a, thla an timuang hle niin kan hria," an ti.

Ramria Mizoram police duty-te'n tui in tur ṭha an nei lo tih sawiin ZPM chuan, "Chaw chhumna tur pawh an neih loh avangin Vairengteah chaw chhûmin, ni tin zing leh tlaiah ei tur pek chawp an ngai. Electric an la nei lo a, kawng lai tlang tawh siin lirthei kal theih lohin tuihâwkin kawng a ṭhuah a, a buaithlak hle," an ti a; medical routine check-up neih mumal a ni ngai lo a, police zingah Covid vei an awm ve ṭhin avangin harsatna an tâwk nasa hle tih an sawi.

ZPM party chuan, "Mizoram sorkarin a rang thei ang berin tui thianghlim in tur leh ei rawngbawlna tur te, electric supply te, medical routine check-up te ngaihtuahsak turin Mizoram sorkar kan ngen a ni," an ti a; Saikhawthlir VC-te'n Mizoram sorkar laka an vuivaina an lo thlen a, Mamit DC hnenah vawi tam tak an thlen tawh ngaihsak an hlawh loh thute min lo hrilh," an ti bawk.