KHAWTHLIR

Mission Veng Branch YMA chuan an kum 80-na lawm nan nimin khan an hall-ah Aizawl Civil Hospital tan thisen unit 105 an pe a, a petute mipa 86 leh hmeichhia 13 an ni.

Mara Students' Organisation (MSO) chuan nimin khan an din champha vawi 55-na, Siahaa an pisaah an lawm a; hmanpuitu MSO president hmasa ber S Hiato chuan, zirlai ruih theih thil ti an tam lutuk avangin hmalak nasat a ṭul thu a sawi. MSO hi kum 1965-ah Shillong-ah din a ni a, an din champha pual hian Siaha district-a ECM Grace Children Home, Salvation Orphanage Home, ECM Agape Home, CCIM KNP Charity Home, Calvary Healing Ministry leh Siaha District Jail-ahte ṭanpuina an pe a ni.

AH&Vety department chuan nimin khan New Siaha kâwnah Animal Sub-Health Centre (ASHC) an hawng thar a, African Swine Fever chungchang inzirtirna an buatsaih nghal. ASHC hawn inkhawm hi Siaha DVO Dr Shahlu Khaila-in a kaihruai a, Model Youth Association president S Lalrinthara'n a hawng. ASHC hi Nilaini leh Ningani chhun dar 12 aṭanga tlai dar 3 thleng hawn ṭhin tur a ni.

Zo Reunification Organisation (ZORO) chuan thuchhuah siamin, Mizoram leh Assam ramria buaina leh a kaihhnawih chungchangah Mizoram páwn hmun hrang hranga Zo fa hnam leh páwl hrang hrangte'n Mizoram leh Mizote an thlàwpzia kawng hrang hranga an lantir chu lawmawm an tih thu an tarlangin, inhmangaih tawna inpumkhat zel turin Zo hnam leh páwl hrang hrangte an sáwm a ni.

State Referral Hospital-ah nimin khan Covid-19 vei mi pali dah luh an ni a, anni nen mi 76 an awm mek a, kum 60 chung lam mi 19 leh kum 14 hnuai lam paruk an tel. SRH-ZMC Bulletin tarlan danin, mi 76 zinga paruk chu ICU-ah enkawl an ni a, mi dang zawng Isolation ward-ah an awm. ICU-a awm zinga pali chu ventilator hmanga enkawl an ni a, pahnih dang pawh oxygen pek mek an ni. Ward-a awm zingah ngaihtuahawm an awm lo.