Health Minister hoin hripui do dan sawiho

Health minister Dr R Lalthangliana kaihhruaiin nimin khan a pisaah Aizawl Municipal Corporation (AMC) councillor-te leh Aizawl City Local Council Association hruaitute'n Covid-19 laka Aizawl khawpui a him theih nan hmalakho dan tur an sawiho.

Dr R Lalthangliana chuan, Covid-19 vei enkawl mek (active case) zinga 60% chu Aizawl khawpuia mite an nih thu sawiin, "Aizawl khawpui enkawl tura mipuite'n an thlan councillor-te leh local council (LC) hotute nen kan hmalak dan leh a kaihhnawih thil pawimawh kan sawiho a ṭul hle a ni," a ti a, hma an lak tawhnaah lawmthu a sawi.

Covid-19 chungchanga thutlukna pawimawh siam a nih dawnin zau taka inràwnkhawmna neih a nih ṭhin thu sawiin Minister chuan, "Tlawmngai pawl te, kohhran hruaitute leh medical expert-te bakah, official pawimawhte nen zau taka sawiho a nih hnuah thutlukna siam ṭhin a ni a, mimal ngaih­dana kal hi kan duh ngai lo," a ti.

Health Minister tarlan danin, Mizoramah Covid-19 vaccine dose 10,03,888 pek a ni tawh a, first dose 7,75,106 (82%) leh second dose 3,36,926 (50.5%) pek a ni tawh.
Fûr lai a nih avanga pek harsatna hmun Mamit leh Lawngtlai district khaw ṭhenkhatah chuan fûr a tàwp veleha pe turin ruahmanna siam a ni.

Ṭhutkhawmah hian AMC councillor-te chuan an bial dinhmun, hmalakna leh harsatna awm thei nia an hriatte bakah rawtna an neihte an sawi a, vaccine la tura inzirtir kawngah theihtawp an chhuah dawn tih Minister an hrilh. An bial chhung dinhmun thlirin, hripui inkai chhàwnna tam ber chu ṭhenawm khawveng leh chhungkhat laina inlenpawh a nih thu sawiin, hemi kawnga mipui mawhphurhna uar zawka inzirtir a ṭul thu an sawi.

Aizawl bawrhsap Dr Lalhriatzuali Rate chuan, red zone puan dan kalhmang, CCCC inenkawlna leh frontline worker zinga Covid-19 vei thite tana Mizoram sorkarin zangnadawmna a siam dil dan turte a sawi a; AMC hotute chuan, zangnadawmna chu September 30, 2021 thlenga hman tur a nih laiin, hripuiin ziaawm lam a pan theih si loh avangin a hun pawhsei ni se an duh thu an sawi bawk.

He hunah hian tun hnaia frontline worker (task force) zinga Covid-19 vanga thi - Vanlaldika, Laipuitlang, ACLCA treasurer leh Lalngaihawma, Venghnuai LC chairman-te an sûn thu an tarlang a ni.