Secretary tlukpui tur OSD atana party mi ruat hi mipui zah lohna a ni - ZPM Ṭhalai

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; OSD to Chief Minister atana MNF adviser Rosangzuala, Luangmual ruat a ni chu mipui zah lohnaa an ngaih thu an puang.

ZPM Ṭhalai vice president H Vanlalhuma chuan, OSD atana Rosangzuala ruatna lehkha a chhuak chuan mipui a barakhaih hle tih sawiin, "Hripui lèn lai, hripui vanga retheihna tâwkte hnenah sorkarin budget aṭanga a hrana ṭanpuina pawh a sem loh laia OSD-a ruat chûk chûk tur khawp hian Pu Rosangzuala hian eng thiamna leh theihna chung chuang bîk nge a neih tih hi CM hnena kan zawhna a ni," a ti.

Thiamna leh theihna bik neih vang ni loa party mi leh sa nih vang ngawta CM-in OSD post a siam a nih chuan, mipui zah lohna lian taka an ngaih thu sawiin H Vanlalhuma chuan, "SEDP Board vice chairman leh adviser to CM ruat a nih dan leh sum luang ral hnem lutuk avanga mipui phun ri zozaite hi sorkar hian a hai der em ni?" a ti a; OSD ruat chuan sorkar hnathawkte pawh a barakhaih thu a sawi.

H Vanlalhuma chuan, officer fel tak tak - Addl CS to CM-te, Secretary to CM leh PS to CM-te duh tâwk loa adviser to CM post a phuahchawp tawh hnuah, OSD post phuahchawp a ni leh zel chu ram leh hnam tana a ṭangkaina tur sawifiah turin CM an phût thu a sawi a, "OSD lawmman tur hi a hmingin Re 1 ruahman ni mah se, mipui rilru kawih her tumna mai niin a lang," a ti.

OSD lawmman bakah hian inrêlbàwlna tur leh thil dangah mipui sum tam tak a luang ral dawn tih hai rual a ni lo tih sawiin Vanlalhuma chuan, "Kan sorkar hian kawng tam takah Covid-19 avanga sum harsatna a chhuanlam nasa hle thung," a ti a; sorkar hnathawk mi 302-te pension tihfel a la nih loh laia mahni thuneihna hmanga officer phuahchawp ruat chu lungchhiatthlak an tih thu a sawi.

ZPM Ṭhalai chuan, adviser neih tam leh board vice chairman neih tam chu sorkar ṭha tehna tur ni se, Mizoram chu India rama state sorkar chak ber pawh a nih a rinawm thu a sawi a, "Covid-19 do kawngah ringawt pawh India rama a do hneh lo ber pawl kan ni mek si. Hei hian adviser, officer, vice chairman ruatte hi public interest ni loin party interest mai a nihzia a tarlang chiang hle a ni," an ti.