KHAWTHLIR

Thisen pe
Mizoram UPC hnuaia ṭhalai pawl, Pentecostal Youth Department, Kolasib Diakkawn Bial chuan nimin khan Kolasib District Hospital-ah thisen unit riat an pe a, petute mipa pasarih leh hmeichhia pakhat an ni.

CYMA leh AR
Nimin khan Aizawla awm 2nd Assam Rifle hotute leh Central YMA office bearer hruaitute chu AR hmunah an inkâwm a, thawhho dan tur an sawiho. 2nd AR commandant Col. Rajesh Kumar Nayak chuan, Mizo mipui tan theihtawp an chhuah tur thu a sawi. CYMA hruaitute pawhin AR nen thawhhona ṭha neih zui zel an duh thu an sawi bawk.

Buhfai tha vailiam
Mamit bawrhsap Dr Lalrozama chuan nimin khan sorkar enkawl sikul hrang hranga chawchhun (midday meal) tur buhfai ṭha leh hrisel bik - fortified rice sem tur chu Mamita Supply kudam aṭangin a vailiam. Fortified rice hi Mizorama Aspirational District awmchhun Mamit district-ah chauh sem a ni. Mamit district-a sorkar enkawl sikul hrang hrangah kum 2021-22 chhungin chawchhun tur fortified rice metric ton 3,205.51 pek a ni ang.

Central hotu kâwm
Veterinary, Fishery & Sericulture Board vice chairman C Lalmuanpuia, MLA chuan September 15, Nilaini khan Ministry of Fisheries, Animal Husbandry & Dairying joint secretary (LH) Upamanyu Basu a kâwm a; Mizoramin African Swine Fever a tawrh dan leh sorkar laipui aṭanga puihna awm thei chungchang a sawipui. Sorkar laipui aṭangin cheng vbc. 29 vel ṭanpuina hmuh beisei a nih thu sorkar thuchhuakin a tarlang.