Aizawl by-pass road tur enfiah mek ; Lei verh dawn leh dawn loh a la chiang lo

Ministry of Road Transport & Highways (MoRTH) hnuaia Mizorama National Highways chei ṭhat hna enkawltu NHIDCL-te'n an rawih consultancy firm-te chuan Aizawl by-pass tur an enfiah mek. Hetih lai hian, Aizawl by-pass road atan hian lei verh tur a nih leh nih loh a la chiang lo.

Vanglaini palai zawhna chhangin Mizo­rama NHIDCL hotute chuan, Aizawl by-pass road tur chu an hnuaia consultancy firm-te'n an enfiah mek thu an sawi a, "Consultancy firm-te hian report an la rawn thehlut kim lo a, report pakhat an thehluhah chuan hmun pakhata lei verh rawtna a tel a; mahse, hei hi tihhlawhtlin a ni ngei dawn tihna a la ni lo a, la zir chian zel tur a ni," an ti.

NHIDCL hotute sawi danin, Mizoram sorkar chuan MoRTH-ah Aizawl by-pass road atana ruahmanna (proposal) an siam bawhzuiin, consultancy firm-te a zir chiantir a; consultancy firm-te chuan an zir chian zawhah an report chu NHIDCL-ah an thehlut ang a, la zir chian nawn leh tur a ni.

NHIDCL chuan zir chianna chu Mizoram sorkar sawipuiin, thil ṭulte tihfel a nih hnuah MoRTH-ah thehluh a ni ang a; MoRTH-in an pawm chuan DPR siamin, chu chu pawm a nih chuan sum sanction turin hma an la ang. MoRTH-in zir chianna an pawm lo a nih erawh chuan project kalpui tum chu a ṭhuanawp dawn tihna a ni.

Aizawl by-pass road tur hi MoRTH-in a pawm a nih pawhin consultancy firm-te'n lei verh an rawtna chu uluk taka zir chian a nih dawn thu sawiin NHIDCL hotute chuan, "A him ngei tura ngaih a nih chauhin verh a ni ang. Lei verh a nih dawnin uluk takin zir chianna kalpui ṭhin a ni a, verh a nih tawhna hmunte chu a him ṭhin a ni," an ti a, tlang ramah pawh lei an verh ve tho thu an sawi.

NHIDCL hotute chuan, MoRTH-in Aizawl by-pass road an pawm a nih pawhin hun a la duh rei tur thu an sawi a, "MoRTH-in an pawm dawn a nih pawhin, an pawm hmaa tih tur a la tam hle. An pawm hnuah pawh tih tur eng emaw zat a la awm bawk," an ti.

Tarlan tawh angin, September 7-9, 2021 chhunga Assembly session neihah PWD enkawltu chief minister chuan, Aizawl khawpui hnuaiah lei verh tum a nih thu hi a tarlang a ni. CM chuan "Aizawl khawpui hnuai­ah lei verh (tunnel) tumna a awm e. Aizawl by-pass road siam nana verhna tur hmun ṭha NHIDCL survey tir mek a ni," a ti.