COVID-19: Mizoram dinhmun ; Hripui vei 1,402 hmuh belh a ni

September 15, Nilaini khan Mizoramah Covid-19 vei mi 1,402 hmuh chhuah a ni a, tun thla chhungin mi 15,469 hmuh a ni tawh. Nimin khan hripui vei dam tawh mi 925 chhuahtir an ni a, Nilaini zan leh nimin khan mi pakhat ve ve an thi.

Covid-19 vei hmuh thar mi 1,402-te chu mipa 670 leh hmeichhia 732 an ni a; ZMC labo­ratory-a hmuh 287, TrueNAT hmanga hmuh 50, RAT hmanga hmuh 1,048 leh Fluorescent Immunoassay (FIA) hmanga hmuh 17 an ni.

IDSP record angin, Mizoramah Covid-19 vei 75,470 hmuh chhuah a ni tawh a, mipa 37,982 leh hmeichhia 37,488 an ni. Nimin tlai dar 5 thleng khan mi 62,172 (82.38%) chhuahtir an ni tawh a, mi 251 (0.33%) thi tawhin, enkawl mek mi 13,047 (17.29%) an awm.

September 15, 2021-a hripui vei hmuh thar mi 1,402-te chu symptom nei 633 leh nei lo 769 an ni a; tualchhunga kái 1,392 leh tun hnaia state pawn aṭanga rawn lut 10 niin, tualchhunga kái zingah kàina chin hriat loh 716 an awm. Mi 1,402 zinga naupang ber chu thla khat mi niin, symptom a nei a; kum 90 tling tawh pahnih awmin, upa ber chu kum 99 a ni.

Nilainia Mizorama Covid-19 vei hmuh chhuah zat 1,402 chu India rama state leh union territory 36 zingah hmuh tam lamah pangana a ni a; Mizoram aia hmuh tamnate chu - Kerala-ah mi 17,681, Maharashtra-ah 3,783, Tamil Nadu-ah 1,658 leh Andhra Pradesh-ah mi 1,445-te a ni. Nimin zinga report tihchhuahah, Mizoram chu hripui vei enkawl mek tam lamah parukna a ni zui zel bawk.

September thla ni 15 chhungin hripui vei mi 15,469 hmuh a ni tawh a, chawhrualin ni tin mi 1,031.27 hmuh chhuah an awm ang a ni. Kum 2011 chhiarpui aṭanga chhutin Mizorama Covid-19 vei hmuh tawh 75,470 chu mi 1,000 zelah hripui vei mi 69 an awm ang a ni a; mi 1,00,000 zela Covid-19 vangin mi 23 an thi tawh ang a ni.

Nimin khan tlai dar 5 thlengin hripui vei dam tawh mi 925 chhuahtir an ni a; Aizawl district-ah mi 442, Kolasib district-ah 195, Champhai district-ah 178, Siaha district-ah 62, Serchhip district-ah 35, Lunglei district-ah pariat leh Hnahthial district-ah mi panga an chhuak.

IDSP tarlan danin, September 15, 2021 thlengin Mizoramah swab sample 9,91,962 endik a ni tawh a, chu'ng aṭanga Covid-19 vei hmuh tawh zat 75,470 chu 7.61% a ni. Hripui vei hmuh tawh zinga mi 71,051 chu Mizoram chhunga kái chhâwng an ni a, mi 4,419 chu Mizoram páwn aṭanga an rawn luh hnua hmuh chhuah an ni.