ZPM Working President thusawi Congress party-in rintlakah ngai lo

Mizoram Pradesh Congress Committee (MPCC) chuan thuchhuah siamin, ZPM working president K Sapdanga'n September 15, Nilainia ZPM pisaa thu a sawiah, 'Sorkarna kan siam a nih chuan eirûk kan khap ang,' a tih chu rintlaka an ngaih loh thu an tarlang.

MPCC chuan, ZPM Working President thusawi chu thil ṭha tak anga ngaih theih a nih rualin, sorkar kalphung hre lo hlea an ngaih thu an tarlang a, "Eng sorkar hnuaiah mah eiruk hi phal a ni ngai lo hrim hrim tih lo hre turin ZPM Working President hi kan chah. Eiruk khap an tum thu a sawi hi khap sa reng a ni," an ti.

ZPM-in kum rei lo te chhungin auhla an thlâk nasa nia sawiin MPCC chuan, "Kan ti ang tia manifesto meuha an dah pawh an bawhchhe nghal zel. A tira an sawi loh ang zela ZPM chêt dante thlirin, ZPM hotuten kan ti ang an tih hi awih mai chi-ah kan ngai tawh lo," an ti a; ZPM manifesto-ah VIP culture tibo turin MLA-te'n designation plate an tár lo ang an tih laiin, a takah chuan an târ niin an sawi.

Congress party chuan, ZPM Val Upa Council-in an MLA-te'n MLA hlawh tihsan an thláwp tur a ni lo, tihsan a nih pawhin hlawh sang hi an la tur a ni lo an tih lai leh September 19, 2019-a MLA-te lehkha an pe vek chungin hlawh sang an lak thu an sawi a; VUC-in an thláwp lo chungin ZPM MLA-te'n car thar an lei deuh vek a, mi dang duh ang an duh ve leh vek zel tho niin an tarlang bawk.