Covid-19 vangin mi 2 thih belh

September 15, Nilaini zan leh nimin khan Covid-19 vei mi pakhat ve ve an thi. Sorkar chhinchhiah angin, nimin tlai dar 5 thleng khan Mizoramah Covid-19 vangin mi 251 an thi tawh a, September thla bikah mi 34 an thi tawh.

Nilaini zan dar 8:50 khan Lalngaihawma (63), Venghnuai, Aizawl chu Covid-19 vangin an inah a thi a, nimin khan vui a ni. Amah hi Venghnuai Local Council chairman leh Venghnuai Local Task Force chairman a ni a, Covid-19 vei a ni tih September 4 khan hmuh chhuah niin, SRH-ZMC-ah dah luh nghal a ni. Venghnuai aṭanga thu dawnna chuan, Lalngaihawma hi a sample endik nawnnaah a negative tawh a, a la dam loh avangin SRH-ah enkawl zui ni mah se, a duh dan angin Nilaini zan khan a thih hmain inah hruai haw a nih thu a sawi.

Covid-19 vei enkawl lai R Lawmthanga (84), Lunglei Theiriat pawh nimin chawhnu dar 2:45 khan SRH-ZMC-ah a thi a, hripui vanga thi 251-na a ni. Covid-19 positive a ni tih September 1 khan hmuh chhuah a ni a, SRH-ah enkawl nghal a nih thu sorkar thuchhuakin a tarlang.