DC-in thawk chak turin hrilh

Kolasib DC Dr H Lalthlangliana chuan nimin khan Kolasib district-a Pradhan Mantri Gram Sadak Yojana (PMGSY) hnuaia Rengtekawn-Builum inkar km. 13.52-a thui leh Bilkhawthlir-North Chawnpui inkar km. 17.56-a thui siam hna thawktute a ko khawm a; chak zawka hna thawh a nih theih nan hna viltu tur team a din nghal.

Dr H Lalthlangliana chuan, Lok Sabha MP C Lalrosanga kaihhruaina hnuaia August 25, 2021-a District Development Coordination & Monito-ring Committee (DISHA) ṭhukhawmin a rèl tawh angin, PMGSY hnuaia kawng siamte chak zawka thawh a ṭul thu a sawi a; hna viltu tur team - magistrate, PWD SDO, Police leh YMA Sub-Hqrs hruaitute zinga mi ruat an nih thu a sawi.

Contractor-te chuan, hripui léng leh ramri buai avangin duh angin hna an thawh theih loh thu an sawi a; an hna chanpual ṭheuhte zo theih tura an inbeisei hun chhiahchhiah a ni a, chumi chhunga hna zo ngei tura intiamna thu ziahtir an ni.