Bangladesh nena insumdawn tawnna tur Assembly Speaker Rinliana'n a tlawh

Assembly speaker Lalrinliana Sailo chuan November 4, Nilaini khan Indo-Bangladesh border trade atana Land Custom Station hmun tur Silsury khua a tlawh a; a hmunhma turte a en bakah, Silsury khawtlang hruaitute leh Bangladesh lama Mizo, Mahmuam aṭanga kalte nen an inkâwm.

Lalrinliana Sailo chuan, Indo-Bangladesh border trade Land Custom Station chu Mizoram mipui tan a ṭangkai dawn thu sawiin, "Kan ram mamawh châkkhai lâk luh nan leh kan rama tharte hralh chhuahna atan hmun pawimawh tak a la nih ngei ka beisei," a ti a; khualzin hîp nan trade centre siam a nih dawn thu a sawi bawk.

Deputy Govt Chief Whip Lalrintluanga Sailo, MLA pawhin thu sawiin, Land Custom Station tur Commerce & Industries department kaltlangin sorkarin a buaipui mek thu leh, Pukzing aṭanga Silsury panna kawng chu tihchangtlun tumin PWD-in an ruahman mek thu a sawi.

Bangladesh nen insum-dawn tawnna kalpuina tura Mizoram leh Bangladesh inkar, Silsury aṭanga Chittagong port leh Bang-ladesh khawpui Dhaka hlat zawng chu a hnuaia mi ang hi a ni.

Silsury - Sajek    km. 8

Sajek - Dighinala    km. 44

Dighinala - Khagrachari    km. 27

Khagachari - Rangamati    km. 72

Rangamati - Chittagong    km. 78

Chittagong - Dhaka    km. 246