Mizoram sorkar leh HPC (D) inremnaah HPC (D) Gen. Hqrs. an lungawi lo

Hmar People Convention (Democratic) General Head­quarters tih hming pûte chuan, Mizoram sorkar leh HPC(D) inremnaah an lungawi loh thu an tarlang a, "Underground-a chêtna North Cachar Hills, Assam leh Manipur-ah kan la kalpui reng," an ti.

HPC(D) hian nimin khan Information & Publicity secretary John F Hmar hmingin thuchhuah an siam a, "Mizorama remna thuthlung ziah hi kan beisei ang a ni lo," an ti a; inremna hian Hmar mipuite tawrhna leh thisen chhuak tawhte a phuhru zo lo niin an tarlang.

Political-a inremna chu duhthusam ang diak diak a ni thei lo tih an hriat chian thu an sawi rualin HPC (D) chuan, "Mizoram State Assembly-in kan rawtna ang Sinlung Hills Council an siam bakah, council area tur chin an tichiang tur a ni," an ti.

Mizoram sorkar leh HPC(D) inremna ziah takah, Sinlung Hills Council-in a huam chin tur tarlan a ni a, inthlan hma chu interim council siam tur a nih thu tarlan a ni thung.

HPC(D) Gen.Hqrs. chuan, Manipur leh Assam-ah an la chet reng (active) thu sawiin, "Assam-a HPC(D)-te chu Assam sorkar nen an inbe mek a, Manipur-a HPC(D)-te chuan United Peoples' Front kaihhruaina Suspension of Operation an kalpui a, inbiakna a kal mek a ni," an ti.

Mizorama HPC(D) movement chu a nung tawh lo mah se, Manipur leh Assam rama Hmar mipuite tan thâ thawh zel a nia sawiin HPC(D) Gen.Hqrs chuan, "HPC(D) hian Mizoram, Assam leh Manipur-a Hmarte tan a thawh a ṭul a, chuvangin, Mizoram sorkar nen chiah inremna kan la siam a ni," a ti a; Manipur leh Assam lama an hmalakna chu a nun reng thu an sawi.

Tarlan tawh angin, Mizoram sorkar leh HPC(D) hian April 2, Thawhṭanni khan State Guest House-ah inremna thuthlung an ziak a; Mizoram sorkar aiawhin chief secretary Arvind Ray leh HPC(D) aiawhin chairman H Zo­sang­bera ten hming an ziak a ni.