Governor-in Rajya Puraskar Award a sem

Mizoram Bharat Scouts & Guides chuan nimin khan Raj Bhavan multipurpose hall-ah Rajya Puraskar Award an sem a; an patron Lt.Gen. Nirbhay Sharma, Governor-in a hmanpui.

Governor chuan, Mizoramah kum thum dawn lai a awm chhungin Mizo ṭhalaite thiam thil leh an theihna a hmuh thu sawiin, an tum ram an thlen ngei theih nan an ṭhat lai hun uluk taka hmang turin Mizo ṭhalaite a chah.

Scouts & Guides naupangte chu hma lam êng takin a hmuak tih sawiin Larsap chuan, "Hlawhtlinna hmu thei tur chuan rilru zau tak pua ram changkang zawkte tih dan an entawn hreh loh a, mahni hnam ṭawng bakah English leh Hindi-te an thiam a pawimawh," a ti.

Rajya Puraskar Award hi scout 52 leh guide 58 hnenah hlan a ni. Tun dinhmunah Mizoramah scout 600 leh guide 922-te'n Rajya Puraskar Award an dawng tawh.