Eco-Adventure Circuit (Skywalk) siam tur Lungphùm Tourism Minister-in a phúm

Aizawl leh Sakawr­hmuituai inkara khual­zin hîpna atana Eco-Adventure Circuit (Skywalk) siamna tur lung­phùm chu nimin khan Sakawrhmuituai tlangah Tourism minister John Rotluangliana'n a phúm.

Lungphûm inkhawm hi Tourism additional secretary Zoramthangi Hauhnar-in a kaihruai a, Tourism Minister, Assem­bly deputy speaker R Lalrinawma leh MLA Hmingdailova ten thu an sawi. Eco-Adventure Circuit siamtu tur Leading Edge Pvt Ltd aiawhte'n hna an thawh dan tur an sawifiah.

Tourism Minister chuan Mizorama a hmasa ber tur skywalk siam thei tura lungphum phumna hun hman a ni chu lawmawm a tih thu sawiin, "Skywalk hian khualzinte hipna atan thil dang hrang hrang souvenir dawr, camping ground, viewing gallery leh a dangte a keng tel dawn a ni. Ṭhalaite tan pawh hawi thawvenna tur hmun ṭha tak a ni ang," a ti a, he project hlawhtlin nan hian Sihphir leh Lungdai mipuiten rilru zau leh inhawng takin khualzinte an lo chhawn a ngaih ṭhin dawn thu a sawi.

Dy. speaker R Lalrin­awma lungphum phum tak chu Lungdai leh Sihphir mipui tan thil lawmawm tak a nih thu sawiin, "Khaw mipuiten eizawnna kawngah an chhawr hle dawn a, khaw mipuite'n khualzinte in lo dawnsawn thiam a pawimawh dawn a ni," a ti.

Thusawitu dang Hmingdailova Khiang­te, MLA chuan, tou­rism hmalakna chu hmasawnna lawmawm tak a nih thu sawiin "Project hlawhtling tak a nih ngei ka beisei," a ti a, project chu ruahman­na ang ngeia a hlawhtlin theih nan thawktute duhsakna a hlan.

Tourism department tarlan danin, Sakawr­hmuituai tlang hi khual­zinte hîpna atan leh mipui chawlh hahdamna atan cheibawl tum a ni a; chuta tan chuan Sihphir aṭanga trekking hmang leh Lungdai aṭangin skywalk hmanga kal thei tura ruahmanna siam a ni.

Trekking route leh skywalk bakah hian, watch tower, viewing gallery, cafetaria, nature trail, visitor centre, traditional entry gateway leh thil dang siam tum a ni.

Tourism department chuan, Swadesh Dharsan Scheme hnuaiah kum 2017-18 chhungin cheng nuai 9,907 an hmu a, chu sum hmang chuan Aizawl, Rawpuichhip, Sakawrhmuituai, Khawh­pawp, Lengpui, Durtlang, Chaltlang, Muthi, Beraw­tlang, Tuirial Airfield leh Hmuifangah khualzinte hîpna tur siam tum a ni.