Zirlaite'n an zinna tur sum dah an phût ; April 10 thleng sorkar an nghak dawn

MSU leh Aizawl City College Joint Student Union (ACJSU) chuan resolution inṭâwm siamin, April 10, 2018 hma ngeia zirlaite tana study tour/excursion neihna tura sum dah turin Mizoram sorkar an phût. An thil phût tihhlawhtlin a nih loh chuan Finance minister Lalsawta leh Higher & Technical Education minister R Romawia te chu báng ngam turin an ngen.

MSU leh ACJSU hruaitute chuan nimin khan Aizawl Press Club-ah thuthar thehdarhtute an kâwm a; MSU president RB Lalmalsawma chuan, kum 2018-19 budget-a zirlaite tana study tour/excursion neihna tur sum dah a nih loh avang leh scholarship tur cheng nuai 41 chauh dah a nih avangin MSU pisaah Thawhṭanni zan khan ACJSU hruaitute nen joint meting an neih thu a sawi a, "Lungrual takin resolution pali kan siam a ni," a ti.

RB Lalmalsawma chuan, zirlaite tana study tour/excursion neihna tur sum dah a nih theihna atan Chief Minister an hmuh thu sawiin, "Finance Minister hmu turin min ti a, mahse, thla khat chhung vel Finance Minister kan hmu thei lo. Kan thil sawi tur a hre lâwk a, min hmu duh lo a ni mai thei," a ti a; an hlauhthawn ang ngeiin Mizoram budget-a study tour/excursion neihna atana sum dah a ni lo chu pawi an tih thu a sawi.

HTE Minister leh Director-te'n study tour/excursion neihna tura budget-a sum dah a nih theihna atan hma an la lo nia sawiin MSU President chuan, "HTE Director hian a thawh chhan zirlaite tan hna a thawh ṭhat loh avangin April 4 aṭangin a pisa kai lo turin kan ngen. Keini chuan kan ngen a, a kal lui a nih chuan a thu a ni tawh mai," a ti.

RB Lalmalsawma chuan, kum 2017-18 ah scholarship atan cheng nuai 87 sên a nih thu sawiin, "Hetiang a nih lai hian scholarship atan kum 2018-19 budget-ah nuai 41 chauh dah a ni hi a beithamin, zirlaite min thamlo hleah kan ngai," a ti a; scholarship atana daih ngei tur cheng vbc. khat dah turin sorkar an phût tih a sawi.

ACJSU president Lalnunpuia chuan, nawr an ni chung pawha sorkarin zirlaite tana study tour/excursion neihna tur sum budget-a a dah loh chu an hriatthiam loh thu sawiin, "Excursion neihna atan hian zirlaite theihtawpin kan inhlawh ve ṭhin. Heti chung pawha zirlaite min ngaihsak lo hi sorkar kan dem tak zet. Zirlaite min ngaihsak lotu hi kan dîm dawn bik lo," a ti.

MSU leh ACJSU hruaitute chuan, budget pass a nih tawh avangin study tour/excursion neihna tur sum budget-ah chuan dah theih a nih an rin bik tawh loh thu sawiin, "Khawi aṭang emawa dah turin sorkar kan phût a ni. NEDP aṭang pawhin dah theih turah kan ngai. April 10 hmaa dah a nih loh chuan nawr buai kher ngai loin Finance leh HTE Minister báng turin kan ngen a ni," an ti a; sum hi dah a nih loh chuan a ṭul anga hma an lak tur thu an sawi.