ASHA lak tharte training neihpui

National Health Mission (NHM) hnuaia accredited social health activist (ASHA) lak thar mi 21-te pualin nimin khan Youth Hostel, Luangmualah Induction Training ṭan a ni a, NHM mission director Dr Lalrozama'n a hawng.

ASHA Induction Training hawnna hi NHM state nodal officer (Community Process) Dr R Lalchhuanawma'n a kaihruai a; Dr Lalrozama chuan, ASHA-te tan vantlang hriselna kawngah hna tam tak thawh tur a awm tih sawiin, "In kutah nasa takin vantlang hriselna a innghat a, hetiang a nih avang hian reporting-ah fimkhur leh uluk taka thil tih a ngai a ni," a ti.

NHM Mission Director chuan, kum kal ta lamah Mizoram NHM-in sum leh paiah harsatna naménlo an tawh avangin ASHA-te'n lawmman an hmu ṭha tâwk lo tih a sawi a, "He harsatna sukiang tur hian nasa taka ṭan lak a ni a, tunah hian incentive pawh felfai taka pek chhuah a ni thei tawh ang," tiin, lawmawm a tih thu a sawi.

ASHA Induction Training hi April 8, 2018 thleng neih a ni dawn a, ASHA-te chu nau piang hlim hriselna, nu leh nau hriselna, khawtlang hriselna leh thupui pawimawh dangte zirtir an ni dawn a ni.

Dr R Lalchhuanawma'n a tarlan danin, Mizoramah kum 2006-ah ASHA kalpui ṭan a ni a, Mizoram pumah ASHA 1,091 an awm mek. ASHA-te enkawl turin ASHA mobilizer mi 109 an awm a, ASHA coordinator pakua an awm bawk.