LADC-ah dàn kalha sorkarna siamah Lawngtlai East MLA-in BJP-te a puh

Lawngtlai East bialtu MLA H Biakzauva chuan nimin khan Aizawl Press Club-ah thuthar thehdarhtute a kâwm a; sorkar siam thei khawp MDC (majority) nei si loin LADC-ah BJP-in sorkarna an chelh mek thu sawiin, "Hei hi dan kalh a ni," a ti.

H Biakzauva chuan, LADC term kal mekah December 4, 2015 khan Congress party-in sorkarna an siam thu sawiin, "Inthlanah Cong­ress-in seat 16, MNF-in seat 8 leh inde­pen­dent-in seat 1 an la a ni. Sorkarna siamtu lam duh danin nominated member pathum dah belh a ni a, a vaiin member 28 (25+3=28) an ni," a ti.

H Biakzauva sawi danin, July 29, 2019 khan MNF MDC 8, Congress MDC 4 leh independent MDC 1 ten United Legislature Party angin sorkarna paihthlak tumin 'no confidence motion' an thehlut a, LADC house-ah fiah tum a nih laiin nominated member-te’n vote neih an tum avangin buaina a chhuak a, sorkar chu fiah a ni ta lo.

October 16, 2020-ah chief executive member (CEM) T Zakunga'n a kaihhruai Congress Legislature Party-te’n lungrual takin a bo bâng awm loin BJP an zawm thu a puang a, October 23-ah Congress MDC pali leh nominated MDC pahnihin BJP an zawm ve loh thu leh, T Zakunga kaihhruai BJP sorkar an support-na an hnuhdawh thu ziakin CEM an pe a ni.

Tuna party hrang hrangte'n MDC an neih dan chu - MNF 12 (Cong­ress aṭangin pali an luh belh), BJP 9 (nominated member pakhat telin), Congress 6 (nominated pahnih telin) leh inde­pendent pakhat an ni. Inthlana thlan tlin (elected member) 25 aṭangin sorkarna siam thei khawp MDC nei an awm lo.

H Biakzauva chuan, Congress aṭanga inlet BJP-te'n majority nei tling lo MDC an nei ṭan chauh a, dan leh Lai ram mipui zahna nei loin rorelna an kalpui niin a sawi a, "BJP tihmélhemtu leh mipuiin rinna an nghah ngam lohzia tilangtu a ni. LADC-a BJP sorkar, majority nei lo, hruaitute chu mipui sorkarna a lo zahawm theih nan báng turin ka phût a ni," a ti.