Mizoram Jouranlist-te'n khawmpui an hmang MJA president thar - Zonunsanga Khiangte

Mizoram Journalist Association (MJA) chuan nimin khan Lal Thanhawla Auditorium-ah khawmpui an hmang a, Finance minister Lalsawta'n hmanpuiin, kum 2018-2020 MJA president atan Zonunsanga Khiangte an thlang.

MJA khawmpui hi vice president Zonunsanga Khiangte-in kaihruaiin, Lalsawta chuan chanchinbua thuziakte'n mi rilru a hneh thu sawiin, "Miin an rilru hahdam lai leh mi tihbuai loh laia an chhiar ṭhin a nih avangin chanchinbu hian mi rilru a hneh thei hle. Chanchinbu hian in hriat phak bakin ram inrelbawlnaah hian hna a thawk ang. In thuziak hi miin an awih vek loh pawhin an rilruah hna a thawk ṭhin," a ti.

Finance Minister chuan ram ṭha lehzual panna kawnga chanchinbumite an pawimawh thu sawiin, "In thuchhuah hian mipuite a khawih avangin chhuah awm leh awm loh in thlan thiam a ngai a ni," a ti a, Mizo chanchinbumite chu a ti ṭha pawl tak an nia a hriat thu a sawi.

Lalsawta chuan khualliana ṭan chu minister, MLA leh official-te'n an chak kher loh thu sawiin, "Min sawmtute hian an thil tihhlawhtlinna leh harsatna puan chhuah a, hriatpui an duh a ni. Kan thusawi leh an thusawite mipui hriat theiha puan chhuahna an zawng a, remchang an dap ve a ni," a ti.

Thusawitu dang MJA president Vanlal­rema Vantawl chuan sorkar mit leh beng chu journalist-te an nih thu sawiin, "Kawng tam takah duhsakna kan dawng a, a lawmawm khawp mai. Hetihrual hian tuna kan dinhmun mek hi sawi ngei ngei a awm e. Budget en hian publicity lamah sorkar hian kum telin a dah tlem tial tial a ni," a ti a, department ṭhenkhat chuan publicity-ah pawisa an dah loh thu a sawi.

Vanlalrema Vantawl chuan media khaw­velah hmasawnna tur a lam tam thu sawiin, "Bu­siness news, business success story leh outstan­ding entrepreneur case study leh an chanchin hrang hrang chhuah tam hi a pawimawh hle mai. Paper leh news channel lamah pawh business news lam uar deuh deuh ila, ram leh hnam tan a pawimawh tak meuh a ni," a ti.

MJA hruaitu nihna hmanga politics kailawn zawh tum ṭâlh an awm theih thu sawiin MJA President chuan, "Hei hian pawl a tizahawm loa, chutiang mite chu kan hnawl zel tur a ni. Politics hi khelh theih a ni teh meuh mai a, mahse pawl hruaitu ni hloh lai nise a duhawm," a ti a, MJA hruaitu ni chunga politics khelh chuan zahawmna ti bawrhbangtu a nih theih thu a sawi.

Inkhawmah hian nikum leh kumin khawmpui inkara MJA member nunna chan mi pahnih - Lalthanzama (Sakeibaknei) leh K Lawmsanga (Newslink) sun an ni.

DR Zirliana (Mizo Aw), V Lallianzuala (Lairam) leh K Thangvela (Zobawm) te hnenah prominent journalist nihna pek an ni bawk a; prominent journalist ni tur hian kum 30 chhung khaihlak loa chanchinbu khawvela awm leh kum 60 tlin a ngai a ni.

Chawhnu lamah kum 2018-2020 chhunga MJA hruaitu tur thlan an ni a, presi­dent-ah Zonunsanga Khiangte (Zonet Zing Daifim/Lenlaini), vice president-ah R Lalhma­ngaihzuala (Romei) leh Lalremsiama (Zawlkhawpui) te thlan an ni a, anni bakah hian executive member atan mi 11 thlan an ni.