Chite lui tibawlhhlawhtu bail theih lohin man theih an ni tawh dawn

April 2, Thawhṭan­nia zawh tak Mizoram Legislative Assembly session-ah Chite lui venhimna tur dan thar, The Chite Lui (Prevention and Control of Water Pollu­tion) Act 2018 (Chite Lui PCWP Act) pawm a ni. He dan thar bawhchhiate chu bail theih loh (non-bailable)-a man nghal theih an ni dawn.

Chite Lui PCWP Act 2018-in a huam chin chu, Chite lui hnár Bawngkawn aṭanga luiin Tuirial a finna thlengin a ni a, km. 20 vela thuia chhût a ni. Lui dung tluanin lui kam lehlam lehlam metre 50 chin zel a huam bawk.

Luiin a huam chin chhungah bawlhhlawh reng reng paih khap a ni a; bawlhhlawh tih hian bawlhhlawh ṭawih thei leh ṭawih thei lo te, leivung te, ran thi te, bio-medical waste-te a huam vek a ni.

Dan bawhchhiaa Chite lui tibawlhhlawhtu chu Section 2-a Sub-Section 7 angin man nghal theih (cognizable offence) a ni a, sub-section 8-na angin bail theih loh (non-bailable) a ni. Mi tu pawhin dan bawhchhia an hmuh chuan an report thei vek a; dan bawhchhetu chu sorkar department an nih chuan head of department chu a tuartu tur a ni. Chite Lui PCWP Act kengkawhtu ber, nodal officer tur chu Aizawl North SDPO a ni ang.

Dan bawhchhiate chu thla thum chhung tàntir emaw, Rs. 10,000 thleng chawitir emaw theih an ni. A tihsual vanga a tihsual ni zat chhûta ni tina Rs. 5,000 thleng chawitir theih dan pawh siam a ni a, dan bawhchhetu hming leh a bawhchhiat chiang taka tarlangin, chanchinbua chhuahtir man amah chawi­tirin, a záwnin ni thum chhung chanchinbuah tih­chhuah theih a ni bawk.