MYC-in ṭhalai hlawhtlingte An chawimawi dawn

MYC Young Achie­ver’s Award State Level Selection Committee chu nimin khan MYC chairman Joseph Lalhim­puia hoin a pisa-ah an ṭhukhawm a, Joseph Lalhmpuia chuan ṭhalai hlawhtlingte chawimawi an nih tur thu a sawi.

Joseph Lalhimpuia chuan Mizoram ṭhalaite kum 40 hnuailam zing­ah an kalna lama mi hlawhtling - mahni zirna, hnathawhna, eizawnna kawng leh mawhphurhna hlen chhuak ṭha, ngaihsan awm leh midangte tana entawntlak zawn chhuaha MYC Young Achiever’s Award dawng tlaka ngaihte chu thlan chhuaha chawimawi an nih tur thu sawiin, "Cheng nuai khat pek an ni ang," a ti.

MYC Chairman sawi dan­in, MYC Young Achie­ver’s Award dawngtu tur thlang tur hian District Level Search Committee din a ni a, chairman atan Deputy Commissioner-te ruat an ni.

Award dawng thei tur hi May 2018 chhungin district tin aṭangin nomination siam fel a ni ang a, June 2018-ah dawng turte thlan fel beisei a ni.