Saitual Group YMA-in khawmpui an hmang Saitual district puitlinna tura hmalak an tum

Saitual Group YMA chuan nimin aṭang khan Buhban khuaah khawmpui an hmang a, Dr. Ngurdingliana, MLA-in a hman pui a, Saitual district pui­tlinna atana hmalak an rel. Khawmpui hi vawiinah a ṭiak ang.

Dr.Ngurdingliana chuan sorkar hmalakna hrang hrangte sawiin, kawngpui siam hnate chak taka kalpui mek a nih thu leh zirtirtu indaih lohna phuhruk mek zel a nih thu sawiin, "Sorkar leh YMA chu inpuhchhe tawn mai loa infuihtawn zawnga kal a pawimawh," a ti a, YMA member chu taima taka hnathawk tur leh intodelh ngei tura theihtawp chhuah ṭheuh turin a fuih.

Saitual Group YMA Conference chuan sorkar khawih agenda zingah 'Aizawl district zau lutuk hi mumal zawka administration a kal theih nan Saitual district hi a taka function a nih theih nan hmalak ni rawh se' tih leh 'Mizoram rami felfai zawka kalpui a nih theih nan hmalak ni rawh se' tih an pass.

YMA khawih agenda zingah, Saitual damdawi-ina hman tur generator lei dan kawng zawn te, Mizoramah kutdawh an awm loh nan a ṭul anga hmalak te, an huam­chhungah hnamdangin dawr an neih loh nana hmalak te, sorkarin zirtirtu indaih dan tehna Pupil Teacher Ratio (PTR) a hman hi thlak a nih theih nan Central YMA-a thlente leh Saitual Group huamchhunga kawngpui black top tura hmalak mekte an pass.

2019 Group YMA Rorel inkhawm chu Keifang Venglai Branch-in a thleng dawn a, 2018-2019 budget atan Rs.1,97,400 pawm a ni. Conference-ah

Saitual Group YMA hnuaiah hian branch 18 awmin member 6068 an awm a, Rulchawm branch chu member tam ber niin 552 an awm a ni.