Primary Agriculture Credit Scheme hawng

Nimin khan North Mualcheng bazar-ah bialtu MLA Vanlalawmpuii Chawngthu-in Primary Agriculture Credit Scheme (PACS) a hawng. PACS hi dan anga din ngai, mumal taka sorkar dan hnuaia kal, pawisa dahna him tak a ni.

Vanlalawmpuii Chawngthu chuan PACS chu kuthnathawktu ṭangrualten anmahni hmasawn zelna tura bank an din a nih thu sawiin, "PACS member-te'n bul ṭanna tur an thawhkhawm a, mipuiten pawisa a pung awma dahin chung pawisa tlingkhawmte chu a mamawh ten pung awm bawkin an puk thei. Heivang hian loneitute tan a ṭangkaiin hmun tam takah hlawk takin an kalpui mek a ni," a ti.

A bial chhung khuate chu khaw taima leh thawkrim tak thin nia a hriat thu sawiin Vanlalawmpuii Chawngthu chuan, "Thawhrim rah nasa zawka in seng chhoh zel theih nan PACS hi a ṭangkai tial tial dawn a ni," a ti a, sorkarin an tana hma a laknate ṭangkai taka lo chhawr a, ṭanpui phu renga hnathawk ṭhin an nih zia lo tilang turin a ngen.

PACS resource person H Resmsangpuia tarlan danin, Mizoramah Mizoram Co-operative Apex Bank an enkawl PACS 26 a awm a, Serchhip district bikah pahnih a awm tawh a, Mualcheng hi pathumna a ni.